Dixebra va repartir 300 copies d’un CD con temes inéditos nel conciertu de Xixón del 11 de marzu

El ‘Bailla la Crisis Tour’, nome que va llevar la xira de Dixebra pal 2011, va principiar el 11 de marzu na Sala Albéniz de Xixón. Les primeres 300 persones qu’entren al recintu van recibir un CD con cinco cantares inéditos de la banda.
 
“El CD ta compuestu por cinco temes inéditos, toos mui baillables. D’ehí’l nome del CD, que tamién ye’l de la xira d’esti añu”, señala Xune Elipe, cantante de Dixebra. “Dos d’ellos son cantares que nun entraron nel nuesu dicu últimu, ‘Amor incendiariu’, porque nun encaxaben nél al ser temes mui baillables, de corte rock-country y funk. Llueu ta una versión de ‘Gaiteru’ y dos remezcles feches por Sergio Rodríguez de ‘Duérmete neñu’ y ‘Pal Caribe’”, añade.
 
El regalu d’esti discu, del que va lanzase un númberu limitáu de copies, tien como oxetivu dar salida a estos cantares y, al mesmu tiempu, promocionar el primer conciertu d’una xira pa la que Dixebra ta preparando munches novedaes. “En Xixón vamos a presentar un repertoriu nuevu, pal que recuperamos temes vieyos como ‘Esto ye Asturies’ o ‘Vientu na cara’. Tamién vamos a poner a la venta ‘merchandising’ del grupu, un aspectu que nunca cuidamos de forma especial y qu’agora vamos a reforzar”, adelanta Elipe. Asina, nun puestín asitiáu nel Albéniz, los siguidores del grupu van poder mercar camisetes, parches y chapes de la banda, ente otros productos.
 
La xira del 2011 de Dixebra, grupu que l’añu pasáu firmó con EP Management, va caracterizase por contar con un bon númberu de conciertos en sales, munchos d’ellos fuera d’Asturies. “Estos años actuamos muncho en festivales y préstanos la idega de poder tocar en sales con una capacidá pa 300-500 persones”, asegura Elipe, qu’anuncia una promoción fuerte de la banda fuera del país, con presencia en delles publicaciones musicales d’ámbitu estatal. “Ye la primer vez que nos plantegamos tocar tanto pel Estáu”, añade’l cantante de la banda avilesina. Madrid, Zaragoza y Andalucía son dalgunos de los llugares onde va sentise la música de Dixebra nos meses próximos, anque de momento namái tá confirmada la yá tradicional actuación del grupu na foguera de San Xuan de Corvera (23 de xunu) y el conciertu del Derrame Rock, un día depués n’Ourense.
 
El preciu de les entraes pa la primer cita de ‘El Bailla la Crisis Tour’ (vienres 11 de marzu, 21.30 hores) en Xixón ye de 12 euros anticipada y 15 en taquilla. Éstes tán a la venta na Llibrería Paradiso y El Barucu, en Xixón; El Ultimo Mono y La Casa Posafuelles, n’Uviéu; y El Cafetón, n’Avilés.