BA, PP y IX piden el sobreseimientu de los espedientes abiertos a los funcionarios de la Campa Torres

Bloque por Asturies, PP y IX-Verdes sacaron alantre esti vienres una moción na que soliciten al PSOE’l sobreseimientu de los espediente abiertos a dos funcionarios de la Campa Torres. Éstos son Ángel Villa y Elisa Collado.
Tanto l’arqueólogu como la direutora de del Muséu Arqueolóxicu cuenten con dos espedientes abiertos pola so actuación nes investigaciones de les escavaciones de la Campa Torres. La Conseyería de Cultura considera que los dos funcionarios tienen responsabilidá nel almacenamientu de 20.000 oxetos arqueolóxicos abandonaos nun recintu clausuráu del muséu. El resto de grupos políticos de la Xunta Xeneral considera que los culpables son otros y que Villa y Collado namái informaron de lo que pasaba na Campa Torres.
 
El grupu socialista rechazó la petición de sobreseimientu del PP, que tuvo l’apoyu de los tres diputaos d’IX-Verdes nel Gobiernu y del Bloque, y aseguró que l’apertura de los espedientes ta basada “na dulda sobre si la so actuación profesional foi la correcta”, esplicó Alfonso Rey. Tamién tomó pallabra la conseyera de Cultura y Turismu, Mercedes Álvarez, qu’acusó a los grupos que sofitaron la moción propuesta pol PP d’actuar movíos pola defensa del ex direutor del Muséu Etnográficu de Grandas, Pepe El Ferreiro. “Vustedes quieren abrir espediente a quién les conviene”, señaló.
 
El popular Alfonso Román López respondió a la conseyera que “tamos ante una persecución a una serie de téunicos que tiene la culpa única d’informar de lo que taba ocurriendo na Campa Torres” y señaló como culpable a Francisco Cuesta, direutor actual del muséu de Grandas y arqueólogu que tuviera munchos años al frente de les escavaciones nel llugar. “Nin entendemos nin tamos d’alcuerdu en que paguen los platos rotos les persones que nun tienen nenguna responsabilidá. De forma inespicable, prémiase al culpable”, añadió.
 
Mentes, Roberto Colunga, diputáu del Bloque, aseguró que los espedientes nun son más que “una cortina de fumu para distrayer l’atención d’unos fecho mui graves”, pa depués señalar que “tamos ante una caza de bruxes. Se espedienta a dos persones por informar mientres que los responsables verdaderos tán, inclusive, premiaos”. Pela so parte, los socios de Gobiernu del PSOE, en pallabres de Diana Camafeita, apuntaron que los espedientes abiertos, que considera inxustos, “demuestren que la propia conseyería tira piedres contra’l so teyáu propiu”.