Los conductores que circulen pela Autovía Minera a última hora del xueves van tener qu’esviase polos enllaces de Riañu y Bendición. La vía va tar cortada per cinco hores, dende les once de la nueche, por obres na llinia eléctrica Soto-Penagos.
Asturies va formar parte del proyeutu LoCaRe pa la reducción de les emisiones de dióxidu de carbonu. Un total de 30 empreses del país van xunise a otres de Suecia, Dinamarca y Italia na introducción de midíes d’aforru y eficiencia enerxética.
El comité de coordinación del Cantábricu Noroeste apuesta pola consecución d'una Indicación Xeográfica Protexía (IXP) pal bocarte del Cantábricu. Asturies, Galicia, Cantabria y Euskadi aconceyáronse en Santiago de Compostela pa tratar esti tema.
Un total de 96.058 pasaxeros utilizaron l’Aeropuertu d’Asturies en febreru, lo que supón 8.358 más qu’en xineru pese a ser ésti un mes más llargu. Con respeuto al mesmu periodu del añu anterior, la medra ye del 8,5 por cientu.
Los alcaldes de nueve conceyos del occidente del país mostraron el so sofitu a un comunicáu de l'Asociación Cultural Xeira. Nél, el coleutivu reclama a la RTPA la emisión de programes en gallego-asturiano na televisión pública.
L’ex conseyeru d’Educación, José Luis Iglesias Riopedre, salió esti llunes de Villabona, onde taba presu dende’l 25 de xineru por un casu supuestu de corrupción na Alministración. Familiares y collacios pagaron una fianza de 100.000 euros.
El vienres pasáu celebróse nel Teatru Filarmónica la VI Gala d’Entrega de los Premios AMAS, onde Corquiéu y Avalanch foron los más destacaos al llevase dos galardones ca ún. Los de Ribeseya ganaron los premios al meyor discu y cantar folk.
La situación de la industria Doy-Manuel Morate sigue preocupando a los vecinos de Trubia y a los ecoloxistes. La Coordinadora Ecoloxista d’Asturies solicitó al Conceyu d’Uviéu que paralice la llegalización de delles instalaciones de la empresa.
Esti fin de selmana pasáu celebróse en Xixón la primer prueba puntuable pal Campeonatu Estatal d’Esgrima en Siella Ruedes, na que l’ayerán Jesús Fernández llevóse’l trunfu en sable. El valencianu Fernando Granell ganó en florete y espada.
El xixonés Muséu Barjola va acoyer dende’l 10 de marzu al 12 de xunu una muestra coles obres de pintores asturianos naciós nes décades del 60, 70 y 80. En total, van esponese les creaciones de 50 artistes asturianos o con relación col nuesu país.
