El númberu de pasaxeros del aeropuertu sigue medrando

Un total de 96.058 pasaxeros utilizaron l’Aeropuertu d’Asturies en febreru, lo que supón 8.358 más qu’en xineru pese a ser ésti un mes más llargu. Con respeuto al mesmu periodu del añu anterior, la medra ye del 8,5 por cientu.
 
Con estos resultaos, l'Aeropuertu d'Asturies fixa'l so enclín de crecimientu y acaba febreru con una medra nel númberu de pasaxeros y tamién na cantidá d'aterrizaxes y despegues, anque les previsiones pal branu en rutes, de forma especial internacionales, nun son mui optimistes, cola posible perda de los vuelos a Bruxelles/Brussel y Lisboa. Según los datos daos por AENA respeuto al mes de febreru, l'aumentu rexístrase tanto en vuelos estatales, con una xuba de los sos viaxeros del 7,5 por cientu, como en conexones internacionales, onde’l númberu de pasaxeros medró un 17,5 por cientu. La suma de los dos primeros meses del 2011 ye positiva pa la infraestructura, que rexistró mientres esti tiempu 183.758 pasaxeros, lo que supón un 11 por cientu más que'l mesmu periodu del añu anterior.
 
El númberu d’operaciones nel segundu mes del añu foi de 1.330, lo que supón un 25,1 por cientu más que'l mesmu periodu del 2010. Un total de 1020 foron operaciones dientru l’Estáu, con un crecimientu del 16 por cientu en comparanza col febreru anterior, y 203, movimientos internacionales, lo que supón un 38,1 por cientu más. Si xuntamos los númberos de xineru y febreru, l'Aeropuertu d'Asturies rexistró 2.567 aterrizaxes y despegues, un 22,1 por cientu más que nel mesmu periodu del 2010.