Jason Wilson, críticu especializáu en bébores, dedicó un artículu en ‘The Washington Post’ a la sidra asturiana. Nél esplica les carauterístiques de la nuesa bébora tradicional y l’escanciáu, y recomienda’l so consumu esti branu.
Ante'l debate d’investidura del que va salir el presidente d’Asturies, Amnistía Internacional (AI) solicita al Executivu nuevu que respete 10 puntos mínimos sobre los derechos humanos. La ONG tamién quier implicar a los conceyos.
El presupuestu d’ayudes complementaries pa estudiantes Erasmus asturianos va pasar de 100.000 a 200.000 euros pal cursu próximu. L’aportación que la Conseyería d’Educación y Ciencia da a cada alumnu ye de 200 euros al mes.
Béal Feirste/Belfast vivió la madrugada del miércoles la segunda xornada d’incidentes ente xunionistes y nacionalistes. Un fotógrafu firíu de bala y dos persones por quemadures son les víctimes d’unes engarradielles que podríen empeorar.
Les empreses asturianes esportaron nel primer cuatrimestre del añu por 1.289,1 millones d’euros. Ello supón una medra del 25,4 por cientu en comparanza col mesmu periodu del añu pasáu, anque n'abril les ventes baxaron un 11,68 por cientu.
El Conseyu de Gobiernu d’esti miércoles decidió la supresión de les enseñances de segundu ciclu d’Inxenieru Informáticu, Inxenieru Xeólogu y Ciencies del Trabayu. D’esta forma traten d’adaptar los estudios universitarios al ‘Plan Boloña’.
El Cine Felgueroso de Sama va acoyer esti vienres la presentación del videoclip de Duerna ‘Fiestes de prau’, el primeru nos sos trés años d’historia. Esti cantar forma parte del discu ‘Manca la maera’, que va salir en pocos díes al mercáu.
L’Asociación Cultural N’Ast critica l’ausencia de l’asturianu nun proyeutu sobre les llingües minoritaries de los países polos que pasa’l Camín de Santiago. Nél tán presentes el bretón, l’occitanu, el vascu, l’aragonés y el gallegu.
Según anuncien dende’l coleutivu Softastur, la versión 5 de Firefox, “el restolador web más usáu n’Europa y emblema del software llibre nel mundu” yá pue descargase de baldre n’asturianu. Esta versión trae delles novedaes importantes.
Una esposición de los trabayos participantes nel VII Concursu de Cómic n’Asturianu de la Mancomunidá de la Sidra va abrir la XV Fiesta de la Oficialidá de la Llingua Asturiana de Bimenes. La muestra va zarrar les sos puertes el 6 de xunetu.
