Jason Wilson, articulista de ‘The Washington Post’, recomienda’l consumu de sidra asturiana

Jason Wilson, críticu especializáu en bébores, dedicó un artículu en ‘The Washington Post’ a la sidra asturiana. Nél esplica les carauterístiques de la nuesa bébora tradicional y l’escanciáu, y recomienda’l so consumu esti branu.
 
Tres un viaxe a Xixón, onde pudo visitar les instalaciones de Trabanco en Llavandera, Wilson quedó encantáu cola sidra asturiana y les costumes qu’alrodien el consumu d’ésta. Ello llevó a esti críticu collaborador habitual de publicaciones como ‘Geographic Traveler’, ‘Travel + Leisure’ o ‘Washington Post’s Sunday’, amás del prestixosu ‘The Washington Post’, a dedicar un artículu a la nuesa bébora tradicional nesti diariu con una tirada de 700.000 exemplares. Un emburrión importante pa la sidra asturiana nos Estaos Xuníos al venir d’una firma que ganó en dos ocasiones el premiu a la Meyor Columna Gastronómica qu’entrega l’Asociación de Periodistes Gastronómicos del país norteamericanu.
 
Na columna espublizada’l pasáu 7 de xunu nel periódicu de la capital estauxunidense, el críticu especializáu en bébores alcoholiques asegura que la sidra nun ye namái pa la seronda, onde ye costume n'Estaos Xuníos beber sidra dulce. La ‘hard cider’, como denominen al otru lláu del Atlánticu a la sidra fermentao, nun tien tanto consumu y Wilson recomienda l’asturiana a los sos llectores nestos primeros meses de calor.
 
L’espertu cuenta detalles de la so visita a Xixón, la esistencia de chigres y l’escanciáu, y destaca’l consumu importante qu’hai de sidra asturiana nel nuesu país. Asina, apunta’l fechu de que’l 90 por cientu de la sidra que se produz n’Asturies consúmase equí como una de les razones de que la so presencia n’Estaos Xuníos sía tán pequeña. Sicasí, apunta que pue conseguise sidra de Trabanco nel país norteamericanu, el llagar más internacional d’Asturies con mercáu n’Australia, Xapón, Sudamérica y dellos estaos europeos, si se busca bien.
 
Samuel M. Trabanco, xerente del Grupo Trabanco, mostróse contentu de qu’un diariu de prestixu internacional como ‘The Washington Post’ empondere les cualidaes de la nuesa sidra y anime inclusive a los llectores a probala esti branu. Ye un impulsu pal reconocimientu n’Estados Xuníos, non solo pa Trabanco, sinón tamién pa tol sector”. Samuel esplica que la rempuesta del consumidor estauxunidense ye bona, como prueba “qu’aumentaramos tanto el volume de les esportaciones como les zones del país nes que yá tamos presentes”.