Irlanda del Norte vive los enfrentamientos más graves de la década última

Béal Feirste/Belfast vivió la madrugada del miércoles la segunda xornada d’incidentes ente xunionistes y nacionalistes. Un fotógrafu firíu de bala y dos persones por quemadures son les víctimes d’unes engarradielles que podríen empeorar.
 
N’opinión de la Policía d’Uladh/Ulster, inclusive esiste “un riesgo potencial” de que muerra dalguna persona. Los incidentes tuvieron llugar en Trá Ghearr/Short Strand, un barriu católicu del este de Béal Feirste que ta nun área de mayoría protestante, pola celebración nestes feches de desfiles pa conmemorar trunfos británicos que, pa los nacionalistes, suponen una provocación. Esta madrugada participaron nos incidentes ente 350 y 400 persones que s’enfrentaron con cócteles molotov, ladriyos y elementos pirotécnicos. Inclusive hubo hasta disparos: seis del bandu católicu y al menos cinco del protestante, según señaló’l primer ministru d’Eire, Enda Kenny.
 
L’irlandés culpó del descontentu social al desemplegu y la “falta d'actividá”, unes cuestiones que calificó de “cáncer” y que, al so xuiciu, amenacen el procesu de paz. Sicasí, añadió que “los que tean implicaos nestos fechos nun pueden y nun van poder perxudicar la normalización de les relaciones ente la comunidá”. La Policía d’Uladh cree que miembros del Ulster Volunteer Force (UVF) foron los qu’entamaron los incidentes de la primer nueche. L’UVF, ún de los grupos paramilitares probritánicos más violentos, aseguró hai dos años que completara l’abandonu de les armes xunto coles otres formaciones milicianes, como establecía l’alcuerdu de paz del 1998.