Mar Zalamín, secretaria d’Aición Sindical d’UXT, señaló que los empresarios “radicalizáronse” tres el trunfu de la derecha nes eleiciones. Considera que son conscientes de que van aprovechase de recortes “brutales” a los trabayadores.
Manfred Gaulhofer, presidente del Comité de Seleición de la Capital Europea de la Cultura 2016, anunció que Donostia va llucir esti títulu nesi añu. Asturies tamién aspiraba al gallardón, pero quedó fuera de primeres por una planificación mala.
La Direición Xeneral de Carreteres retrucó a les acusaciones de la Coordinadora Ecoloxista sobre afeiciones medioambientales posibles nes obres del enllaz de Lieres. El Gobiernu asegura que cumplen cola declaración d’impactu.
La banda folk de la cuenca’l Nalón Duerna yá dio a conocer el so vidiu ‘Fiestes de prau’, nel que se representa una romería asturiana. Esti tema ta dientro del discu ‘Manca la maera’ que va presentase’l 24 de xunetu nes fiestes de Santiago, de Sama.
‘Lluis’, de Nacho Fonseca, foi la obra escoyida como ganadora del XIV Concursu de Cuentos pola Oficialidá. D’esta forma, el ‘alma’ de Xentiquina recibe otra bona noticia na selmana na que’l so proyeutu musical pa neños va vivir un homenaxe.
En San Xuan cumpliéronse cinco años de la muerte d'Igor Medio y Carlos Redondo nun accidente de tráficu con Felpeyu camín de Catalunya. La música asturiana torna a homenaxealos esti martes nel xixonés The Monkey Club.
Xurde Fernández y Marián García, autores de ‘L’árbol de la verdá’, van tar esti martes en Candás, na Llibrería Pallabres de Carambelu’, pa presentar esti llibru d’aventures. Los escritores van facer una llectura de la obra a los neños presentes.
El 12 de xunetu ye la fecha escoyida pola Xunta de Voceros aconceyada esti llunes na Xunta Xeneral pa celebrar el Plenu d’Investidura. Un día depués, Asturies podría tener presidente nuevu si dalgún candidatu algama la mayoría absoluta.
El CUPA reclamó a la Universidá d'Uviéu la modificación del borrador del Reglamentu d’Estudios de Doctoráu pa que sía llegal presentar tesis n’asturianu. El testu recueye namái la posibilidá de facelo en castellanu.
‘Vlaanderen Vakantieland’, espaciu turísticu selmanal en flamencu de la televisión pública belga, va emitir un reportaxe sobre Asturies. Un equipu de la cadena ta dende’l domingu trabayando nel nuesu país pa la ellaboración del programa.
