N’Ast critica l’ausencia del asturianu nun proyeutu sobre les llingües minoritaries del Camín de Santiago

L’Asociación Cultural N’Ast critica l’ausencia de l’asturianu nun proyeutu sobre les llingües minoritaries de los países polos que pasa’l Camín de Santiago. Nél tán presentes el bretón, l’occitanu, el vascu, l’aragonés y el gallegu.
 
Nel proyeutu européu ‘Camín de les cultures y les llingües’ participen l’Euskarabidea (Instituto Navarro del Vascuence), la Secretaría Xeral de Política Llingüística de la Xunta de Galicia, Ofis ar Brezhoneg (Oficina de la Llingua Bretona), Academia de l’Aragonés, la Christian-Albrechts-Universitaet zu Kiel (Schleswig-Holstein, Alemaña) y Euroccat (Eurocongresu 2000 de los países occitanos y catalanes), y ta financiáu pola Axencia de la Cultura de la Comisión Europea. El so oxetivu ye promocionar les llingües minoritaries de los países pelos que pasa’l Camín de Santiago y ente les sos actividaes previstes tán la puesta en marcha d’una web multillingüe y una esposición itineraria que va tener la so primer parada n’Orreaga/Roncesvalles del 11 al 31 de xunetu.
 
Tres esta población navarra, la muestra va visitar Puente la Reina (del 3 al 31 d’agostu), Santiago de Compostela (del 5 de setiembre al 24 d’ochobre) y Kiel (del 28 d’ochobre al 22 d’avientu). Amás, va celebrase un congresu nel mes d’ochobre en Santiago baxo’l títulu ‘Europa nes sos llingües y cultures’, na que van participar representantes de les entidaes públiques y privaes que trabayen na promoción de les llingües minoritaries de los territorios per onde pasa’l Camín.
 
N’Ast, nun comunicáu robláu por Maruxa Marqués García, señala que valoren de forma positiva “esti proyeutu nel sentíu en que reivindica la esistencia d’una Europa cultural y llingüísticamente diversa acullá de los estaos anguañu esistentes, poniendo amás de relieve la importancia histórica del Camín de Santiago comu canal de comunicación y exa vertebradora de la Europa occidental” y destaca que “per primer vegada” vaya ser utilizada la Propuesta Ortográfica del Estudiu de Filoloxía Aragonesa con proyeición internacional. Por contra, critiquen l’ausencia del asturianu dientru d’esti proyeutu, lo que rellacionen al “despreciu institucionalizáu y la voluntá de marxinación de la castra que gobernó Asturies a lo llargo d’estos trenta años últimos hacia tolos trazos específicos de la identidá asturiana”.