Vegas: “Queremos un mandatu-marcu ambiciosu, tamién no llingüístico”

“Lla RTPA tien que tener una programación n'asturiau como mínimu del 50 por cientu, en toles franxes horaries y en toles tipoloxíes de programación”.

El voceru de Convocatoria por Asturies, Xabel Vegas (Xixón, 1978), faló con Asturies.com del mandatu marcu de la RTPA, de la esperiencia de gobiernu, de la coalición y de Sumar.

¿Cuála ye la propuesta de Convocatoria por Asturies pal mandatu-marcu?

El nuestru plantegamientu ye facer un mandatu-marcu ambiciosu. Si tardamos diez años en facelo, lo mínimo ye facelo bien.

Pa Convocatoria por Asturies hai cuatro oxetivos prioritarios: en primer llugar facer de la RTPA un serviciu públicu orientáu a la información y a la cultura, cola cohexón territorial como ún de los sos principales oxetivos.

La RTPA tien de ser un motor de desarrollu y de cohexón territorial

En segundu llugar da-y a los y les profesionales de RTPA mayor pesu nel diseñu de la programación, sobremanera nos informativos, con ferramientes como'l Conseyu d'Informativos que, anque ta na llei de 2014, nunca nun se creó.

En tercer llugar convertir a la televisión nel motor del desarrollu de la industria audiovisual asturiana, incluyendo a les productores independientes.

Y en cuartu llugar, pero non menos importante, facer de la RTPA una ferramienta de normalización llingüística.

¿Ye coincidente col de la otra parte del Gobiernu?

Como tovía nun entamamos los trabayos d'ellaboración del documentu, nun tuvimos inda la posibilidá de debatir col grupu parllamentariu socialista sobre los detalles. Pero en principio la disposición ye bona y existe'l compromisu de dialogar ente los socios de gobiernu enantes de dar pasos.

¿Por qué ye importante introducir la cuestión idiomática nesti documentu?

Nun ye importante: ye fundamental. El mandatu-marcu ye'l documentu que va orientar a la RTPA nos próximos 9 años. Hasta agora’l papel del asturianu na programación de la RTPA foi testimonial y eso hai que lo correxir.

La televisión y la radio pública asturiana nun puede siguir dando-y la espalda a la realidá llingüística asturiana.

Sicasí, al final va ser el contratu-programa, que dependería del Executivu, el que marcaría hores, xeneros o porcentaxes de programación.

Ehí hai un debate. El mandatu-marcu nun ye una llei nin un reglamentu, ye una norma sui generis, y por tanto nun ta escrito en nengún llugar onde termina'l mandatu-marcu y onde empieza'l contratu-programa.

Obviamente’l mandatu-marcu nun puede afogar les posibilidaes del contratu programa: tien que dexa-y espaciu. Pero la nuestra intención ye agotar les posibilidaes del mandatu-marcu.

El plantegamientu ye cenciellu: el llexislador quixo que'l mandatu-marcu tuviera una duración de 9 años. Nun ye casual. La idea ye que nun coincida con llexislatures naturales. D’esa manera’l mandatu-marcu nun respuende a la coyuntura política.

La programación n'asturianu tien de ser un mínimo del 50% y l'amestáu nun pue pasar por asturianu

Nós queremos un mandatu-marcu ambiciosu porque nun ye descartable qu'esti documentu tea vixente con un gobiernu de la derecha y la ultraderecha n'Asturies, anque vamos facer tolo posible por evitalo.

Por eso paeznos que lo meyor ye nun dexa-y más espaciu del razonable al contratu-programa, que ye una ferramienta gubernamental. La RTPA nun puede tar al serviciu del gobiernu de turnu, seya del color políticu que seya. Y pa eso lo meyor ye facer un mandatu-marcu ambiciosu, tamién nel tarrén llingüísticu.

¿Qué espaciu debería tener l’asturianu y el gallego-asturiano na RTPA?

Na mio opinión la RTPA tien que tener una programación n'asturiau como mínimu del 50 por cientu, en toles franxes horaries y en toles tipoloxíes de programación. No que cinca l’eonaviegu, hai que lo estudiar detenidamente pa ver si ye técnicamente posible desdoblar llingüísticamente la televisión y la radio na zona Navia-Eo.

¿Qué opinión-y merez el que tuvo nestos cuasi 20 años d’emisión tanto na televisión como na radio?

Mala. Mui mala. El espaciu pal asturianu foi testimonial. Y pal eonaviegu foi cenciellamente inexistente. Lo poco que se fizo nel tarrén llingüísticu foi más por compromisu de dellos profesionales que pola propia dirección del ente.

Amás hai que vixilar que nun pase por asturianu lo que ye amestáu, como ocurre agora.

Otra manera, ¿cómo ta siendo la esperiencia de gobiernu?

Ye bona pero complexa. Gobernar nun ye cenciello. Les demandes de la sociedá son munches –y munches veces en direcciones contraries– y a veces nun ye fácil da-y respuestes a toes. Pero defendemos que la meyor manera de tresformar la realidá ye coles ferramientes que te da'l gobiernu. Hai quien prefier tar siempre na oposición, porque te permite dicir casi cualaquier cosa ensin asumir nenguna responsabilidá.

La realidá tresfórmase coles ferreamientes que da tar nel gobiernu

D'otru llau la esperiencia de gobiernu ye un bañu de realidá y d'humildá. Cuando tas na oposición pienses que les coses son más cencielles de lo que realmente son. Pienses que too respuende a la voluntá política. Y nun ye asina. Les coses siempre tienen más complexidá de lo que paez dende fuera.

Pero insisto: sólo nel Gobiernu disponemos de les ferramientes pa tresformar la sociedá (menos de los que mos gustaría, eso sí) y pa facer un poco meyor la vida de les persones. Y pa dalguien d'izquierdes ye imperativu utilizar eses ferramientes siempre que tengamos la posibilidá.

¿Hai bona sintonía cola FSA?

Haila. Pero tamién hai dificultades. El nuestru papel ye puxar pa que la FSA tenga postures más valientes. Y ye una batalla diaria.

¿Tien la marca Convocatoria por Asturies percorríu?

Creo que sí. Por agora consiguimos crear un espaciu con xente mui diverso nel que la convivencia ye particularmente bona. Eso yá ye una novedá dientro de los munchos esperimentos d'unidá de la izquierda asturiana que fracasaron por rocees y egos varios.

Puede paecer secundario, pero les rellaciones entre la xente que lidera'l proyeutu son perimportantes pal éxitu del mesmu. Y en Convocatoria creo que dimos cola fórmula.

¿Hai consensu sobre cómo construyir Sumar n’Asturies? ¿Con qué formaciones o coleutivos cuenten?

La construcción de Sumar n'Asturies pasa por Convocatoria, d’eso nun hai dulda nenguna. Convocatoria ye un espaciu consolidáu que nació col mesmu plantegamientu pluralista y de vocacion de gobiernu que Sumar.

Convocatoria por Asturies ye'l referente de Sumar n'Asturies

En definitiva, Sumar y Convocatoria somos una mesma cosa. Pero nun niego qu'hai otros espacios n'Asturies que pueden aportar a Sumar-Convocatoria y que van alcontrar una mano tendida de nuestra parte.

Ehí ta EQUO, que ye'l únicu partíu que ta en Sumar a nivel estatal pero nun ta en Convocatoria. Habrá que falar con ellos, porque obviamente tienen un papel que xugar.

Pero tamién ye obvio que Convocatoria por Asturies ye'l referente de Sumar n'Asturies. Y nun lo decimos nosotros. Ye'l mesmu Sumar el que lo ve asina.

¿Cuála ye la rellación del grupu parllamentariu col diputáu de Sumar nel Congresu, Rafa Cofiño?

Inmeyorable. Ye'l nuestru diputáu y ye unu más. La coordinación con él ye total. Asturies tien muncha suerte de tener un diputáu como Rafa Cofiño, verdaderamente comprometíu col territoriu.

El mes pasáu ufría al PP sentase pa buscar “ente toos un modelu d'oficialidá col que puedan sentise cómodos”, una “fórmula d'oficialidá amable que permita construyir un gran pautu pol nuesu patrimoniu llingüísticu”. ¿Ve posible un cambiu na postura d’esta formación?

Soi escépticu pola trayectoria del PP nesi sen. Pero tamién lo yera cola FSA y finalmente cambió de posición. Cónstame qu’Álvaro Queipo ye sensible a la cuestión llingüística, pero desgraciadamente la so postura sobre la oficialidá ye la que ye y nun hai munches perspectives de que cambie.

Cónstame qu'Álvaro Queipo ye sensible a la cuestión llingüística

Pero eso nun puede impidir qu'avancemos nel tarrén de la normalización y de los derechos llingüísticos. Nosotros tendimos-y una mano al PP pa trabayar nesi sentíu. Esperemos que recueya'l guante.

¿Va haber avances en política llingüística esta llexislatura?

Espero que sí. La política llingüística depende de la parte socialista del Gobiernu y confío nel papel de Vanessa Gutiérrez como conseyera. Va tener tola collaboración de Convocatoria por Asturies na responsabilidá que tien asumida. Pero tamién vamos ser esixentes porque nun podemos tener una llexislatura en blancu nel tarrén llingüísticu como la pasada.