La Conseyería de Cultura va promocionar l'asturianu en “Expolingua Portugal”

La Conseyería de Cultura "acudirá la próxima selmana (4-6 de marzu) en Lisboa a 'Expolingua Portugal', una de les feries más importantes d'Europa, na que van presentase les principales novedaes na estaya de la didáctica y la enseñanza y aprendizaxe de llingües", según informa nuna nota de prensa. Asimesmo'l Gobiernu asturianu "aprovechará la so presencia pa presentar nel Institutu Cervantes una antoloxía de poesía portuguesa coordinada por Xuan Bello n'edición billingüe".

La Conseyería de Cultura y Turismu, "interesada en difundir la llingua asturiana fuera d'Asturies contribuyendo al so reconocimientu esterior, participará na presente edición d'Expolingua cola collaboración de l'Academia de la Llingua Asturiana y el Gremiu d'Editores d'Asturies". Pa ello, el nuesu país contará "con un stand de 18 metros cuadraos con un equipamientu y un diseñu novedosos y atractivos, nel que va ufiertase a los visitantes información en dellos idiomes sobre la llingua asturiana, la so historia y situación y espondráse una amuesa de publicaciones: diccionarios, gramátiques y normativa, amás de les últimes novedaes editoriales". Tamién va tar presente la Directora xeneral de Política Llingüística, Consuelo Vega,"col oxetivu de promocionar la llingua asturiana".

Aprovechando la presencia en Expolingua Portugal, la Conseyería de Cultura "presentará en Lisboa una antoloxía poética billingüe, coeditada pol Gobiernu del Principáu y la editorial Trea y coordinada por Xuan Bello. El llibru quier ser un homenaxe a la lliteratura portuguesa, una de les más ilustres d'Occidente, y una amuesa del afectu qu'Asturies siente pa con Portugal". La presentación va facese na sé del Instituto Cervantes de Lisboa'l 5 de marzu. Van tar presentes nella dos de los poetes portugueses antologaos: Valter Hugo Mãe y Nuno Judice.

Expolingua Portugal dende 1989 esparde y promueve la importancia del estudiu de llingües y el conocimientu de nueves cultures. La Feria ye visitada cada añu por miles de persones que topen nella les novedaes mas recientes na estaya de la didáctica y de la enseñanza y apredizaxe de llingaes. A esta edición acudirán representantes d'instituciones culturales de distintos países, d'embaxaes, universidaes, ministerios y gobiernos, per una parte, y d'escueles d'idiomes y servicios venceyaos al mundu de les llingües, per otra.