El nacionalismu pierde la hexemonía nel parllamentu vascu

Los resultaos, condicionaos enforma pola illegalización de D3M y la francedura de la coalición PNV-EA, amuesen una suba de PSE y Aralar y faen posible que'l PNV dexe'l gobienu depués de cuasi 30 años.

Una nueche na que too foi posible dio como resultáu un parlamentu nel que PSOE y PP, quiciabes necesitando l'ayuda d'UPyD pueden sacar al PNV del gobiernu. Asina, anque'l PNV algama un bon resultáu y ye'l ganador indiscutible, nun ye a sumar apoyos pola mor del descalabru d'EA y EB, los sos socios nel gobiernu. Nin sumando los 4 escaños d'Aralar-y saldríen les cuentes.
 
El PSE enanta enforma la so base electoral, pasa de 18 a 24, anque  hai que tener en cuenta que los 9 diputaos algamaos hai cuatro años por EHAK, repártense agora ente les formaciones que sí se pudieron presentar. El PP, anque baxa nun contestu como esti, daqué que supondría nun resultáu permalu n'otres circunstancies, ye la llave que pue facer a Patxi López lehendakari. 
 
Aralar conviértese nun referente claru de la izquierda nacionalista vasca blincando d'ún a cuatro escaños y algamando representación nes trés circunscripciones. El partíu fundáu pol ex miembru de Batasuna Patxi Zabaleta, que yá tenía una presencia perimportante en Navarra va asina recoyendo per un llau parte d'un votu de la izquierda abertzale que de forma sele pero constante va pingando escontra esta formación que refuga dafechu la violencia, y per otru beneficiándose del argayu d'EB, a la que'l so electoráu nun-y perdonó la so presencia nel gobiernu. Ye especialmente llamadera la cayida d'Ezker Batua en Vizcaya, provincia na que'l líder d'esta formación y conseyeru del gobiernu vascu, Xabier Madrazo, pierde'l so escañu, que gana Aralar.
 
Quiciabes el mayor desastre de la nueche ye'l d'EA, qu'apostó pola francedura de la so coalición col PNV pa buscar el votu nacionalista con un perfil más soberanista y entornáu más a la izquierda y fracasó dafechu algamando únicamente 2 escaños, que podríen quedar en 1 depués de cuntar n'Alava'l votu per corréu.
 
UPyD entra nel Parlamentu con un diputáu por Alava y tresformándose nuna formacíón decisiva pa la fomación del gobiernu, especialmente si EA caltién el so escañu alavés y el PSE nun algama los 25. Anque UPyD ye normalmente ún de los partíos perxudicaos pol sistema electoral, nesti casu'l so escañu, algamáu con menos de 6.000 votos, ye decisivu.
 
D3M, escluyida de les elecciones, reclama más de 100.000 de los votos nulos, lo que supondríen 7 escaños, 2 menos de los qu'algamara EHAK en 2005. Si fora asina, l'ausencia de la izquierda abertzale illegalizada, y polo tanto l'altu númberu de votos nulos, ye una de les claves qu'esplica la nueva mayoría colo qu'almuercen güei los ciudadanos d'Euskadi.