Les minoríes étniques de Kosovo vense obligaes a marchar del territoriu pola discriminación

La independencia de Kosovo dexa un vacíu efeutivu na proteición internacional pa les minoríes, un fechu qu'empeora la situación d'estos grupos y obliga a un númberu d'ellos a abandonar el país, según alerta del Grupu Internacional pa los Derechos de les Minoríes (MRG, poles sos igles n'inglés) nun informe publicáu güei.
 
Nel so informe, esta ONG señala que les minoríes como los 'ashkali', los bosniacos, croates, exipcios, xitanos, serbios y turcos, ente otres, entamen a abandonar Kosovo, porque s'enfrenten a la esclusión y en munchos casos a la discriminación nel país.
 
"La restricción de movimientu y la esclusión política, social y económica la esperimenten especialmente les minoríes más pequeñes", señaló'l director executivu de MRG, Mark Lattimer. "Estes minoríes tamién sufren la falta d'accesu a la información o a la educación superior nes sos llingúes lo que, combináu coles difíciles condiciones económiques, provocó que munchos d'estos grupos entamen a abandonar Kosovo", añadió.
 
Nel so últimu informe, la organización manifiesta que la falta de seguridá sobre l'estatus del territoriu como resultáu de la oxeción de Serbia a la independencia de Kosovo llendó l'aplicación práctica del Derechu Humanitariu Internacional. "Hai un peligru de que les nueves organizaciones internacionales que trabayen en Kosovo van agravar el fracasu de la misión de la ONU pa esti territoriu, la Minuk, p'asegurar una sociedá tolerante y multiétnica", señaló Lattimer.
 
L'informe tamién alerta de que, a menos qu'esta tendencia seya invertida, va vese una migración continua de los grupos minoritarios que viven en Kosovo dende hai cientos d'años, como los bosniacos y turcos.
 
Una década dempués del conflictu, hai xente de les comunidaes más pequeñes que tovía ablaya en campamentos de desallugaos y en condiciones graves cerca de Mitrovica, señala'l MRB. Pa los 'ashkali', los exipcios y romanís, que nun tienen nengún otru país al qu'escapar, estes tendencies probablemente van conllevar que s'arraigonen la probitú y la marxinación mayor pa les xeneraciones vinientes, añade.
 
El documentu tamién pide a les autoridaes de Kosovo qu'aseguren la participación activa de toles minoríes en tolos aspeutos de la vida pública, y afirma que'l procesu d'ingresu na UE tien el potencial de trayer meyores a la vida del so pueblu. Tamién pide a la UE qu'amplíe y meyore l'atención que da les cuestiones a les que s'enfrenten les minoríes nel país y la discriminación de les muyeres d'estes minoríes.