El Sporting sigue siendo de Primera

|

El Molinón vivió un resumen perfectu de lo que fue esta temporada. Nervios y sufrimientu a partes iguales, que xunto a la épica amestáronse nun partíu qu'había que ganar. Y como yá pasó los dos últimos años nos partíos claves, el Sporting ganó. Un añu más, el nuesu país va tener un representante na máxima categoría del fútbol.

Los xugadores del Sporting sabíen lo que taba en xuegu cuando saltaron al campu. Nel Molinón nun cabía un alma y Xixón paralizóse durante casi les dos hores del partíu. Y el nerviosismu y l'afoguín por resolver l'encuentru y la temporada dieron como resultáu una primer parte nel que la impotencia n'ataque xunida a un error defensivu propiciaron el gol d'un Recreativo que yá taba en Segunda dende la xornada anterior. Nes grades cundía'l nerviosismu, mas teniendo en cuenta les noticies que veníen de Pamplona. Nesos momentos, y hasta l'empate asturianu, el Sporting tuvo virtualmente en Segunda.

Na segunda parte los xixoneses cambiaron de cara. La entrada nel campu de Luis Morán diba ser fundamental. El Sporting acosaba, llanzábase contra la portería de Riesgo ensin complexos, sabiendo qu'había que marcar sí o sí. Y por fín llegó'l gol nes botes de Barral, tres una xugada individual na frontal del área rematada por un disparu frontal. Nesi momentu'l Sporting salía del descensu. Sicasí, volvíen les males noticies dende Pamplona. L'Osasuna marcaba dos minutos depúes y devolvía al Sporting al infiernu. Yera yá evidente nesos momentos que los asturianos teníen que resolver ellos mesmos la permanencia. Había que ganar y olvidase de los demás partíos. Y nel minutu 66 llegó la épica de la mano del lluanquín Luis Morán. Lo mesmo que nel primer gol de Barral, avanzó pela banda derecha, buscó la frontal y de tiru cruzáu batió al porteru del Recreativo. Un gol que sacaba al Sporting del descensu y que supunxo a la fin la permanencia. Darréu d'ello, los últimos vente minutos fueron de sufrimientu: un gol andaluz supondría'l descensu. Y a puntu tuvo de llegar nun remate de cabeza de Martin que por mui poco salió fuera. Ehí podemos dicir qu'acabó'l partíu afortunadamente.

Col pitíu final llegó l'aliviu y la celebración d'un Molinón emocionáu que va siguir, por fin, viviendo na élite del fútbol. Xixón, Asturies y tola afición sportinguista merecíenlo. Agora toca disfrutar cola perspectiva d'un añu más en Primera. Tiempu habrá, esperemos, d'igüar los errores d'esta temporada p'afrontar la próxima con, a lo menos, un poquitín más de tranquilidá.

Ficha Técnica

Sporting de Xixón 2-Recreativo de Huelva 1 

Sporting: Cuéllar, Sastre, Gerard, Iván Hernández, Cámara, Diego Camacho, Michel, Pedro (Luis Morán m 58), Kike Mateo (Bilic m 58), Diego Castro (Maldonado m 80) y Barral.

Recreativo: Riesgo, Nef, Morris, Quique Álvarez, Poli, Martín, Vázquez (Juan m 81), Maidana (Javi Fuego m 45), Nayar, Sisi y Marco Rubén.

Goles
: 0-1 Martín (m 23), 1-1 Barral (m 57), 2-1 Luis Morán (m 66)

Árbitru: Iturralde González (vascu). Sacó tarxetes amarielles a Cámara (m 39), Quique Álvarez (m 67), Luis Morán (m 87), Morris (m 88), Barral (m 90).

Comentarios

El Sporting en Primera y yo con respiración asistida.
GRACIES POR PODER SIGUIR ENTE LOS MEYORES.

Bien ta lo que bien acaba. Pero por favor, l'añu que vien quiero un poquiñín más de tranquilidá, que vivir l'añu pasáu un ascensu y esti una permanencia na última xornada va matame¡¡¡¡

Solamente dicir una cosa: PUXAAAAAAAA SPORTIIIIIIIIINGG!!!!!!!!!!!!!!!!!!

Agora a facer les coses bien, a fichar lo que se pueda y sobre too a disfrutar.
¡Puxa Sporting!

Contador Estadistiques