Vecinos de Corvera estudien denunciar l'autovía Llanera-Avilés

Vecinos de Molleda estudien recurrir a los tribunales pa paralizar el trazáu de l'autovía Llanera-Avilés, pol impautu que tien sobre'l nucleu d'Entrialgo-Xunceo. Los vecinos caltuvieron conceyos cola Direición Xeneral de Carreteres, con tolos grupos políticos del Conceyu de Corvera, col alcalde y colectivos d'ecoloxistes, tres lo qu'entendieron "la necesidá d'actuar con urxencia de manera eficaz y con contundencia col envís de correxir esti irracional trazáu".
   Tamién consideren "imprescindible acudir a la vía xudicial" pa parar la tramitación d'esti proyeutu al amparu de la llexislación medioambiental, según informaron nuna nota prensa.
   Los afeutaos aseguren qu'esti nuevu trazáu provoca que los vecinos d'Entrialgo-Xunceo se vean "gravemente afeutaos pol una irracional propuesta que diba condenar al barriu d'Entrialgo a quedar enzarráu ente'l viaductu d'esta nueva autopista y el yá existente de l'autopista nacional A8".
   Aseguren, amás, que'l nuevu trazáu atraviesa L'Escañoriu na zona que ta catalogada como espaciu protexíu y tamién afeuta a la zona que ta considerada como monumentu natural.
   Por dambes razones, el colectivu vecinal "tomó la iniciativa pa promover actuaciones col envís d'evitar esta agresión a los sos vecinos y al espaciu protexíu de L'Escañoriu".