Irlanda va celebrar el segundu referendu sobre'l Tratáu de Lisboa'l próximu 2 d'ochobre

Irlanda va celebrar el segundu referendu pa la confirmación del Tratáu de Lisboa'l próximu 2 d'ochobre, según anunció'l primer ministru del país, Brian Cowen, demientres una intervención nel Parlamentu irlandés.Los últimos sondeos realizaos sobre'l Tratáu de Lisboa apunten a una victoria del sí nesta ocasión.

   Según Cowen, les garantíes llegales daes polos Ventisiete a Dublín ante les preocupaciones plantegaes sobre'l Tratáu de Reforma allanaron el camín pa la celebración d'una consulta, dempués de que los irlandeses refugaren el testu nuna primer consulta en xunu del 2008."Sobre esa base, recomendé al Gobiernu que volvamos al pueblu pa buscar la so aprobación pa qu'Irlanda confirme'l Tratáu", esplicó'l primer ministru, anunciando que "esi referendu va celebrase'l 2 d'ochobre".

El ministru d'Esteriores irlandés, Michael Martin, tentó güei otra vuelta de defender la importancia del Tratáu pa Irlanda demientres la presentación d'una guía sobre esti documentu. "El Gobiernu piensa qu'esti Tratáu ye bonu pa Irlanda y bonu pa Europa y la nuesa llabor agora ye defender la nuesa causa ante los ciudadanos", afirmó'l titular d'Esteriores.