ArcelorMittal va regular a más de 1.600 operarios d'Hojalata, Estructura y TBC a últimos d'agostu

La multinacional ArcelorMittal comunicó ayer a los sindicatos nel senu del conceyu del Comité de Siguimientu de l'Aplicación del ERE, la regulación de más de 1.600 operarios nes instalaciones d'Hojalata, el tren semicontinuu (TBC) y Estructura. Según informó'l presidente del comité d'empresa de les instalaciones y miembru d'UXT, Raúl Marquínez, lo anunciao nel conceyu ye muncho más negativo de lo esperao.

   "Les espectatives son mucho peores de lo que sospechábemos, falamos de más de 1.600 persones regulaes. El volume ye mayor del qu'esperábemos, porque siempre pensamos que'l personal d'Estructura diba vese afectáu, pero que'l d'Hojalata y el TBC tamién lo tea ye un asuntu verdaderamente preocupante que nun mos augura un bon futuru", dixo Marquínez.

   Según informó un voceru de la compañía, va regulase personal de trés departamentos diferentes. Asina, nes instalaciones d'Hojalata la regulación va afectar a tola instalación que permanez parada del 25 d'agostu al 3 de setiembre, axuntando a tol personal, lo que supón falar d'unos 400 operarios regulaos.

   Nel casu del TBC o tren semicontinuu, la parada va efectuase demientres cuatro díes, del 22 d'agostu al 25 d'agostu dambos incluyíos, y la mesma diba afectar a la práctica totalidá de la plantiya, a dalgo más de 400 trabayadores.

   No que cinca al área d'Estructura --qu'aconceya la división d'alministración y otros cuantos departamentos-- la regulación va afectar a unos 800 persones. Nesti casu la regulación va facese efectiva dos díes a la selmana dende'l mes de setiembre hasta últimos d'esti  añu, díes que van tar siempre lligaos al descansu.

   A pesar del altu númberu de personal que va vese afectáu pola regulación n'Asturies, dende la multinacional resaltaron que la planta asturiana ye la europea con menor aplicación del ERE. "Forzamos al máximu pa tentar de retrasar l'ampliación del ERE y agotamos toles midíes alternatives", indicó un voceru de la compañía.