El Gobiernu asturianu da'l preste a nueves titulaciones universitaries

El Conseyu de Gobiernu dio'l preste a una serie d'iniciatives empobinaes a l'adaptación de la Universidá d'Uviéu al Espaciu Europeu d'Educación Superior. D'esti mou aprobóse'l Proyectu de Decretu d'Enseñances Universitaries Oficiales y Centros y autorizóse la creación de 12 títulos de Grau y 15 títulos oficiales de Máster Universitariu.

Esti Proyectu de Decretu d'Enseñances Universitaries Oficiales y Centros regula l'aprobación de la programación universitaria per parte del Conseyu de Gobiernu asturianu y la implantación, adaptación o supresión d'enseñances oficiales, o la creación, fusión, modificación y supresión de centros.

Los nuevos Graos

El Conseyu de Gobiernu dio'l preste tamién a doce decretos qu'autoricen la implantación de les enseñances oficiales de Grau na Universidá asturiana dende'l próximu cursu, que son los que vienen darréu:  Graos en Bioloxía, Biotecnoloxía, Enfermería, Filosofía, Física, Fisioterapia, Xeografía y Ordenación del Territoriu, Historia, Historia del Arte, Historia y Ciencies de la Música, Matemátiques y Química.

Toles titulaciones d'anguaño finarán cursu a cursu y respetaránse los derechos de los alumnos matriculaos pa que puedan rematar los sos estudios acordies al plan nel qu'entamaron la so formación universitaria. Tamién facilitaráse qu'aquellos que quieran puedan incorporase a los nuevos graos col reconocimientu de les asignatures feches.

15 Títulos oficiales nuevos de Máster Universitariu
 
Na mesma sesión el Gobiernu asturianu autorizó la implantación de 15 títulos oficiales de Máster, que son los que vienen darréu: Máster n'Investigación en Neurociencies; Investigación en Psicoloxía de la Salú; Síntesis y Reactividá Química; Inxeniería de Procesos y Ambiental; Inxeniería Enerxética; Inxeniería Mecánica, Diseñu, Construcción y Fabricación; Ciencia y Tecnoloxía de los Materiales; Sistemes y Servicios Informáticos pa Internet; Español como Llingua Estranxera; Filosofía del Presente; Historia y Análisis Sociocultural; Identidaes Culturales Europees. Testos y Contestos; La Ciudá Medieval; Les ciudaes del Arcu Atlánticu. Patrimoniu cultural y Desarrollu Urbanu; y Música, Comunicación y Instituciones na España Contemporánea.

Estos 15 Másteres améstense a la oferta que se vien diseñando dende l'añu 2006. Anguaño hai yá 16 Másteres oficiales autorizaos y en setiembre se aprobaránse otros 10, colo que'l nuesu país contará con una oferta de más de 40 Másteres Oficiales el próximu cursu.