La Col.lá Propinde anuncia nuevu discu

El grupu l.lenizu La Col.lá Propinde ta terminando de preparar lo que va ser el so tercer discu d’estudiu tituláu "A teyavana", un trabayu que cuenten con sacalú al mercáu a primeros d'esta seronda. Esti grupu asturianu amás va actuar el prósimu día nueve d’agostu en Valdesoto (Siero) y el 22 d’agostu en Xixón, nel Festival 5º40”, onde adelantarán dalgún de los temes nuevos.

La Col.lá entamó a grabar nel mes de mayu nos Estudios TUTU de Corevera con Sergio Rodríguez como Productor. “Tamos grabando unos 15 temes pa depués escoyer unos 11 o 12, non más. Entá nos queda grabar dalguna cosina ya igualo too terminar el trabayu”. Nel discu van poder sentise temes tradicionales y temes de composición propia, munchos d’ellos pa cantar.

“En cuanto al títulu, decidimos que fuere A Teyavana, porque de xemes, sentímonos asina y la nuestra música ta siempre al descubiertu, ensin nenguna barrera nin teyao. Con esti títulu queremos facer el nuestru homenaxe particular a Nel Amaro, un bon amigu del grupu, quien escribió una bona montonera de columnes periodístiques entitulaes de la mesma manera, con un conteníu siempre perinteresante”.

Tamién quieren incluyir dientro del discu un tema que prepararon pal programa de Camín de Cantares dirixíu por Xose Antón Ambás, col que se zarró esta temporada. “El tema ye una reel.laboración que nos pasó Ambás sobre dos pieces del Gaitiru de Carabanzo y la verdá ye que foi una esperiencia prestosa y si ye posible meterémoslu dientro del discu como daqué mui especial pa nos”.