El presidente'l Gobiernu, José Luis Rodríguez Zapatero, anunció esti llunes que'l Gobiernu sopelexará cambeos impositivos nes rentes de capital y les plusvalíes, y que "tocará y camudará" la deducción de 400 euros nel IRPF pa facer frente a la recesión económica y a la cayida la recaudación.

   Nuna rueda prensa col primer ministru suecu y presidente de turnu de la UE, Fredrik Reinfeldt, Zapatero afitó que l'Executivu, pela cueta, "nun tocará" los tipos del IRPF nin l'Impuestu Sociedaes, esceutuando la baxada yá anunciada pa pymes que caltengan y creen emplegu. "Apuntemos per ónde van les premises", indicó.

   Les rentes del capital son les que proceden de productos financieros, como depósitos bancarios, beneficios de fondos d'inversión, seguros de vida o plusvalíes obteníes pola venta d'aiciones o viviendes.

   "Esto ye no que tamos trabayando, tengamos prudencia y esperemos a la Llei de Presupuestos", señaló Zapatero, que repitió que los cambeos impositivos sedrán "prudentes, moderaos y llendaos", lo que permitirá que la presión fiscal siga en niveles "asemeyaos y mesmamente menores" a los que rexistró enantes de qu'aportare al poder.

   Asina, el presidente afitó que los cambeos impositivos nos que trabaya'l Gobiernu nun afeutarán a lo cabero a les rentes del trabayu nin a les empreses, al afitar que namái hai ciertu espaciu nel entornu a los 400 euros y en "dalgún otru espaciu fiscal", qu'a lo cabero identificó como les rentes de capital y les plusvalíes.

   "Nun contemplamos tocar los tipos d'IRPF", afitó, tres esplicar que, nun momentu como'l d'anguaño onde se necesita tantu emplegu, ye necesario caltener les rentes del trabayu pa nun encarecer los puestos de trabayu.

   Zapatero repitió una vegada más que la política fiscal ye un instrumentu que'l Gobiernu tien d'emplegar pa responder a la situación económica, sobre too, cuando hai cambeos tan bruscos como los qu'hubo nos caberos tiempos.

   Nesti sen, recordó que cuando los tipos d'interés aportaron al 5% el Gobiernu reaccionó con una respuesta fiscal "razonable" en beneficiu de tolos ciudadanos, que consistió en crear una deducción estra de 400 euros nel IRPF pa tresferir 6.000 millones a la sociedá española.

"YE RAZONABLE"

   Al empar, sopelexó que, nuna grave crisis qu'obliga a incrementar el gastu pa dar seguranza a la cohesión social, el Gobiernu "ta obligáu" a pidir a una parte importante de la sociedá que faiga un "pequeñu esfuerciu" pa sofitar a la xente que tien más dificultaes.

   "¿Por qué se lo pidiremos? Porque ye razonable", sorrayó Zapatero, quien afitó que, una vegada que la economía lo permita, el Gobiernu socialista volverá a baxar los impuestos. "Nun lo facemos por xubir impuestos, la tendencia d'esti Gobiernu ye baxalos", destacó.

   Nesti sen, recordó que l'Executivu socialista fizo una reducción impositiva d'unos dos puntos del PIB desque ta nel poder (20.000 millones d'euros), centrada nuna rebaxa de cinco puntos nel Impuestu Sociedaes, en cambeos nos tipos del IRPF (xubida del mínimo esentu y deducción de 400 euros) y la supresión del Impuestu Patrimoniu.

   A lo cabero, Zapatero sorrayó que toles reformes que se vaigan acometese s'aprobarán por Llei, polo que'l Parlamentu xugará un papel "esencial" nesti asuntu. "El Gobiernu tien de dialogar colos grupos políticos p'algamar un consensu lo más ampliu posible", amestó

"ESO NUN YE IMPROVISAR, ESO YE GOBERNAR"

   Al empar, defendió la llabor del Gobiernu nesta materia y afitó que lo único que fizo l'Executivu foi responder a la situación económica. "Eso nun ye improvisar, sinón ser consciente de la coxuntura que se vive", señaló'l presidente, quien s'amosó convencíu de que munchos ciudadanos entenderán les subíes impositives.

   "Con una pequeña aportación, cada español va favorecer qu'una persona que yá nun tien sofitu asistencial puea tenelu seis meses y puea facer un cursu formación. Eso ye lo que vamos a pidir y toi convencíu de que ye razonable. Nun ye improvisar, sinón responder a la situación, eso ye gobernar", sorrayó.