Softastur completa la traducción al asturianu d'OpenOffice

El colectivu de voluntarios Softastur ta acabante de completar la torna al asturianu de la suite ofimática OpenOffice.org. La versión nueva tará a disposición de los usuarios de cualisquier sistema operativu (GNU/Linux, Windows, Mac Os, etc) a partir de la versión 3.2 d’esti paquete de ferramientes informátiques, que s’espublizará en próximes feches.

Según Sofastur, OpenOffice.org "ye anguaño el principal competidor de la suite ofimática privativa Microsoft Office, y la so penetración vien medrando de forma bultable nos años últimos, especialmente nel mercáu empresarial, profesional y alministrativu. Los últimos estudios espublizaos coinciden en que na redolada’l 15% de los usuarios de Windows nel mundu tienen instaláu esti paquete, y ye la opción mayoritaria en sistemes GNU/Linux".

La so traducción al asturianu supunxo más de dos años de trabayu pa los voluntarios de Softastur, nel que contaron col conseyu de l’Academia de la Llingua Asturiana. La torna d’Open Office ye, además, el segundu proyeutu de mayor volume completáu pol colectivu, tres de la distribución Ubuntu del sistema operativu  GNU/Linux. Cola próxima espublización de la versión 3.2 de OpenOffice.org, los usuarios qu’asina lo deseen van poder contar con un procesador de textos (Writer), la fueya de cálculu (Calc) o el programa d’elaboración de presentaciones (Impress), ente dellos otros recursos, dafechu n’asturianu.

Dende'l colectivu conseñen que "OpenOffice.org surdió de la suite StarOffice, desarrollada por StarDivision, que foi alquirida en 1999 por Sun Microsystems. Nel añu 2000, lliberóse’l so códigu fonte pa tentar de facer frente a Microsoft Office. Anguaño, el so códigu fonte distribúise embaxo llicencia LGPL y se puede descargar de baldre dende’l sitiu n’internet openoffice.org. La suite compónse del procesador de textos Writer, la fueya de cálculu Calc, la ferramienta de presentaciones Impress, la base de datos Base, l’editor de gráficos Draw y l’editor de fórmules matemátiques Math".