Asturies entama la campaña de vacunación contra'l gripe A

El Serviciu de Salú del Principáu d'Asturies emprincipia esti llunes la campaña de vacunación contra'l gripe A. Anguaño 102.000 vacunes yá tan distribuyíes nos centros de salú d'atención primaria, llugar onde van vacunase les persones que lo soliciten previa cita.Esta enfermedá supunxo un aumentu del 16 por cientu nes baxes llaborales durante la última selmana.

Según el SESPA existen delles diferencies sobre la vacunación del gripe estacional, por cuenta que la del gripe A va dirixida a persones que tienen los mesmos factores de riesgu, pero a los que s'añaden les persones con obesidá mórbida y les embaranzaes. Sicasí, nun se considera necesaria la vacunación a mayores de 65 años que tean sanos. Aparte, la vacuna va dirixida a personal sanitariu, personal de cuidáu de persones mayores y inválides, y personal de "servicios esenciales", como les fuerces y cuerpos de seguridá del Estáu, los bomberos, el 112, trabayadores del aeropuertu, de salvamentu marítimu, de Cogersa y los de la maquinaria de quitanieves d'Aucalsa.

Les vacunes contra'l gripe A vienen con trés presentaciones distintes. Pa les persones de seis meses a 17 años vien en formatu unidosis, como la vacuna estacional. Nel tramu 18-60 años, la presentación ta en formatu multidosis, con frascos qu'hai qu'amestar p'algamar diez dosis. A lo último, pa los mayores de 60 años vien tamién un envase multidosis yá mecíu. De momentu nun hai prevista una fecha d'acabación pa la campaña.