Cornualles aprueba la señalización billingüe n'inglés y córnicu

Los miembros del Cornwall County Council (Conseyu de Cornualles) votaron a favor de que los carteles de les cais y carreteres apaezan en córnicu ya inglés. Anque’l billingüismu namás va aplicase a les señales de nueva instalación y les que yá funcionen nun van ser camudaes, pa qu’asina la midida nun suponga un sobrecoste pa les arques del Estáu. El Conseyu señaló, énte les crítiques de los conservadores, que tien la obligación llegal de promover la llingua y que quier tener en cuenta’l córnicu nel so día a día.

El córnicu desapaeció nel sieglu XVIII, anque dende finales del sieglu XIX entamó a recuperase como llingua d’usu gracies al gran númberu de testos conservaos. Anguaño, l’idioma ye un elementu importante de conciencia nacional y, anque ensin nengún reconocimientu oficial, falen córnicu unes 500 persones, anque unos 3.500 tienen dalgunos conocimientu anque nun seyan a falalo.
 
Tamién tien presencia en dalgunes escueles como asignatura optativa y Radio Cornwall emite un programa selmanal de quince minutos nesta llingua. Dalgunos padres neofalantes entamen a educar a los sos fíos en córnicu, cosa que nun pasaba dende fai más d’un sieglu. Anguaño, 120 escolinos estudien l'idioma en primaria (d’un total de 39.000 alumnos) y 70 en secundaria ( de 32.000).
 
En 2008, dempués de dos años de trabayu, la Kowethas an Yeth Kernewek (Asociación de la Llingua Córnica) votó a favor d’una norma escrita qu’unificara les cuatro ortografíes esistentes en Cornualles. Asina, queríen da-y puxu al idioma na escuela y na vida pública énte l’importante interés pola llingua na sociedá. Una norma estándar que cuenten revisar en 2013.
 
La última falante materna de córnicu foi Dolly Pentreath, que morrió en 1777. Según la lleenda les sos últimes palabres foron "Me ne vidn cewsel sawznek!" (¡Nun quiero falar inglés!). Anguaño, el movimientu de reivindicación llingüística córnicu llucha pa que la Carta Europea de les llingües minoritaries reconoza’l córnicu, yá qu’anguaño ye consideráu pola UE como un idioma muertu.