Cándido y Morala recurren l'autu que determina que'l xuez nun sobrepasó les sos funciones na interpretación del indultu

El titular del Xulgáu de lo Penal númberu 1 de Xixón, Lino Rubio Mayo, refugó les alegaciones de los dos sindicalistes, Juan Manuel Martínez Morala y Cándido González Carnero, nes que señalaben que'l xuez "sobrepasare" les sos funciones na interpetación del indultu parcial. L'autu, nel que se señala que la interpretación foi l'apropiada, recurrióse güei.

Juan Manuel Martínez Morala y Cándido González Carnero, condenaos polos estrozos d'un videocámara demientres les movilizaciones de Naval Xixón, entendíen que'l xuez "sobrepasare o escediérase" na interprentación, al entender que l'acuerdu adoptáu pol Conseyu de Ministros en setiembre indultábalos también del pagu de la multa de 2.160 euros, que sí venía recoyida na sentencia incial, de 14 de febreru del 2007.
 
Según l'autu del xuez al que tuvo accesu Europa Pres, en virtú de dichu acuerdu conmutábase la pena privativa de llibertá impuesta por otra de dos años de prisión, cola condición de qu'abonaren les responsabilidaes civiles fixaes na sentencia nel plazu que determinare'l tribunal. Amás, nun podíen volver cometer delitu dolosu nel plazu de cuatro años.
  
Asina, el 7 d'ochobre del 2009 notificóse a los condeanos a los términos del acuerdu y requirióse-yos l'abonu de la indemnización fixada a favor del Conceyu de Xixón, asina como'l pagu de la multa de 2.160 euros.
  
L'autu indica que l'acuerdu del Conseyu de Ministros "llenda la conmutación de les penes única y esclusivamente a la pena privativa de llibertá impuesta por otra de dos años de prisión". Considérase, poro, que la pena de multa permanez inalterable y que nun se produxo escesu d'interpetación xudicial, sinón "estrictu cumplimientu de lo acordao".
  
Los sindicalistes contiúen pendientes de la respuesta xudicial a otra solicitú cursada'l pasáu 16 d'ochobre al Xulgáu de lo Penal númberu númberu 3 de Xixón pa la suspensión de la pena impuesta al entender que'l PSOE ingresó na cuenta del xulgáu la indemnización de 5.624,83 euros que deben al Conceyu.