Occitania acueye un congresu européu sobre la tresmisión de les llingües minoritaries

La ciudá occitana de Tarba acueye esti vienres y sábadu un importante congresu européu que lleva por títulu "La tresmisión natural y familiar de la llingua occitana y de les llingües rexonales y minoritaries n'Europa", y nel que van participar, xunto a espertos occitanos, representantes d'otres minoríes llingüístiques europees como galeses, bretones, vascos, gallegos, irlandeses, araneses o de la minoría sueca en Finlandia.

Esti Congresu, entamáu pol Institut d'Estudis Occitans, quier afondar nuna de les cuestiones claves na supervivencia de tolos idiomes: la so tresmisión xeneracional. Una problématica que la llingua occitana y bona parte de les llingües minoritaries europees y mundiales sufren anguaño. Ye por tanto intención de los espertos aconceyaos en Tarba (Tarbes en francés) esplicar y intercambiar les esperiencies de les distintes minoríes llingüístiques a la hora de tresmitir los sos idiomes. Asturies.com ufre a los sos llectores, adxuntu al final d'esta noticia, el programa, en francés y occitanu, d'esti Congresu.

L'occitanu, una llingua en peligru de desapaecer

L'occitanu ye una llingua falada nel sur de Francia, nel valle d'Arán en Cataluña, en Mónaco y nel oeste del Piemonte italianu. Solo ye oficial en Cataluña, mientres que n'Italia ta reconocida como llingua "protexida", pero nun s'emplega oficialmente, anque les autoriades italianes tienen previsto nos próximos años desarrollar un réximen d'oficialidá nos valles piamonteses onde se fala.

En Francia, onde nun se tien previsto da-y estátus de cooficialidá a nenguna de les sos llingües minoritaries, existe la posibilidá d'estudiar occitanu en ciertes escueles públiques y nes denominaes "Calandreta" ("calandrina"), una rede d'escueles privaes d'inmersión llingüística nel idioma del país. En 2005, 78.000 alumnos estudiábenla nes escueles públiques y 2.100 nes Calandretas. Sicasí, anque les cifres d'alumnos pueden paecer importantes, hai que recordar que'l territoriu d'Occitania tien más de 12 millones d'habitantes, de los cuales, según les distintes encuestes, de 526.000 a 1.939.000 son falantes del idioma. D'ellos, solo ente un 12% y un 20% tresmite la llingua a los sos fíos. Asimesmo, un bon númberu de los sos falantes empleguen un occitanu amestáu col francés y nun ambiente diglósicu dafechu. A too ello añádese que los medios de comunicación nun suelen emplegar l'occitanu, arrequexándolu a unos pocos minutos d'emisión a la selmana.  

Anguaño, la que se conoz como la llingua de los trovadores, la única llingua non estatal mundial, xunto al yidish, qu'algamó tener un premiu Nobel nesti casu na figura del escritor provenzal Frédéric Mistral (1830-1914), llucha por buscar el so sitiu nel futuru como una llingua viva.