Los sindicatos del enseñu convoquen una concentración contra la Llei d’Evaluación

CSIF, FE-CCOO y SUATEA convoquen una concentración mañana miércoles dos d’avientu, a les 17.30 énte la Xunta Xeneral del Principáu. Los sindicatos d’enseñanza quieren denunciar que la Llei d’Evaluación ye discriminatoria y apelen al “sentíu de la responsabilidá” de los partíos representaos nel Parlamentu.

Los convocantes denuncien que la llei parte d’un alcuerdu ente Alministración y dos sindicatos que nun son mayoritarios nel sector. Al traviés d’un comunicáu esclarien que la llei namás que tien como fin llegalizar unos pagos qu’unos reciben y otros non y que yá foron cuestionaos pola xusticia.
 
Del mesmu mou, critiquen qu'arreya’l pagu a la superación d’una evaluación que ye desconocida y califiquen la llei como un monstruu, “tanto dende’l puntu de vista éticu como xurídicu”.