L’Asociación pa la Recuperación de la Memoria Histórica quier que la RAE camude la so definición de “franquismu”, al considerala l’asociación demasiao feble. Poro, lleven selmanes recoyendo ente los sos socios definiciones del términu.

La principal conclusión de la Tertulia Pachín de Melás celebrada ayeri foi que la entrada del asturianu nel sistema educativu foi una mala esperiencia pa la FSA, salió demasiao bien y el Gobiernu asturianu nun va permitir que la xente salga del colexu con una actitú positiva haza la llingua.

Los sindicatos axuntaron énte Presidencia n'Uviéu a más de 300 trabayadores pa pidir la dimisión de Riopedre y reclamar que "acabe cola discriminación de la enseñanza concertada". Según el Principáu, la fuelga tuvo un siguimientu del 30%.

El voceru de la esquierda abertzale, Tasio Erkizia, anunció van tentar d'unir fuerces, "promoviendo una alianza, filando y creando esa rede social de collaboración y trabayu en común, en pro de la soberanía".

El Consorciu pa la Xestión del Muséu Etnográficu de Grandas de Salime alcordó'l relevu del direutor del centru, José Naveiras Escanlar, conocíu popularmente como Pepe el Ferreiro, "énte la serie de problemes que tán llastrando'l so funcionamientu y el cumplimientu de les funciones que tou muséu tien encamentaes por llei". El Consorciu nomó al historiador Francisco Cuesta Toribio, nuevu direutor del muséu.

Fai güei 50 años, morría en Xixón Obdulia Álvarez Díaz, La Busdonga, según tolos espertos la gran dama de la canción asturiana de la primer metá del sieglu XX, la época de los cantaores que sentaron escuela pa les xeneraciones vinientes.

Xuventú Asturianista quier la dimisión del Conceyal de Cultura y Llingua de Xixón, Jesús Montes Estrada, pola so “falsedá política y hipocresía” cola llingua asturiana.

Les mocedaes del Partíu Asturianista señalen que Montes Estrada participa nun ayuntamientu que refuga la llingua, “mientres organicen la gala “Xixón fala n’asturianu” al traviés de la so Conceyalía”. Del mesmu mou, señalen la inutilidá del so cargu "yá que l’Ayuntamientu nun usa la toponimia y nun fai un usu real del asturianu”.

El voceru de cultura d’UNA, Ignaciu Llope, considera que tien de facese casu a los espertos y siguir coles investigaciones en La Carisa, yá que la paralización de les escavaciones vien polos "prexuicios ideolóxicos" del Principáu.

El ministru d'Educación, Ángel Gabilondo, propunxo güei a los conseyeros autonómicos del ramu que 4º de la ESO conviértase nun cursu "orientador". L'oxetivu ye qu'ayude a alumnos a decidise ente cursar bachilleratu o inclinase pola Formación Profesional (FP)

Asina, quieren llograr que nel 2020 el 85 por cientu de los estudiantes algamen un títulu que garantice la so empleabilidá.

La collaboración ente les empreses del país y Arxelia foi medrando nos últimos años de manera "importante", hasta'l puntu que de los seis millones d'euros d'esportación que se rexistraben hai un añu, pasóse a once y espérase algamar la cifra de 20 "en pocu tiempu".