UNA diz que la paralización en La Carisa ye por "prexuicios ideolóxicos"

El voceru de cultura d’UNA, Ignaciu Llope, considera que tien de facese casu a los espertos y siguir coles investigaciones en La Carisa, yá que la paralización de les escavaciones vien polos "prexuicios ideolóxicos" del Principáu.

Énte les últimes informaciones qu'indiquen que, pese a les peticiones de los conceyos d'Ayer y Ḷḷena, el gobiernu asturianu nun va apurrir más financiación pa siguir coles escavaciones en La Carisa, Unidá Nacionalista Asturiana criticó duramente esti parón, afirmando que La Carisa y tolo que l'arrodia ye vital pa conocer el nuesu pasáu y supón un retu pa los investigadores.
 
Pal voceru de cultura d’UNA, "nel fondo d'esti aparente desinterés, tán presentes prexuicios ideolóxicos basaos nel auténticu pavor que tien la FSA-PSOE a poner en valor y dar a conocer cualquier aspectu que tenga que ver cola identidá específica asturiana". Pa Llope,“cualesquier gobiernu asturianu consecuente y responsable centraría gran parte de los sos esfuerzos nuna zona importantísima pa conocer meyor d'au venimos”.
 
Según Llope, "cola política de cultura basada en xigantismos delirantes y escomanadamente caros, como los de Llaboral, o n'atopar el nuesu pasáu romanu en cualquier requexu, quiciabes pensando de forma restorcida, que la presencia romana n'Asturies pue tapecer la singularidá de la historia y la identidá asturiana".
 
Llope comentó qu'estos xacimientos, en cualquier otru llugar sedríen motivu d'arguyu pero equí paez que molesten. “Nun hai nengún procuru nin interés nel estudiu científicu, la so conservación, y la so divulgación" declaró Ignaciu Llope, añadiendo que "otru casu significativu ye'l de la Sierra de Carondio, nel conceyu d'Ayande, onde'l gobiernu asturianu xunto coles empreses xeneradores d'enerxía van acabar con ún de los conxuntos megalíticos más importantes d'Asturies".
 
Sicasí, Llope emponderó a los representantes municipales d'Ayer y de Ḷḷena pol so interés n'invertir los sos recursos nel mantenimientu de les escavaciones "exemplu que debería siguir la Conseyería de Cultura, que manexa unos presupuestos muncho más elevaos que los d'estos conceyos. Amás de tener en cuenta que los trabayos que requeríen una mayor inversión económica yá se ficieron nos años anteriores, polo que dar por acabáu l'estudiu, cuando los propios espertos consideren que ye necesario más
tiempu, ye un ensinsentíu".