El Principáu diz qu'El Ferreiro incumplió los requerimientos d'información

El Consorciu pa la Xestión del Muséu Etnográficu de Grandas de Salime alcordó'l relevu del direutor del centru, José Naveiras Escanlar, conocíu popularmente como Pepe el Ferreiro, "énte la serie de problemes que tán llastrando'l so funcionamientu y el cumplimientu de les funciones que tou muséu tien encamentaes por llei". El Consorciu nomó al historiador Francisco Cuesta Toribio, nuevu direutor del muséu.

Nos últimos años, el Consorciu, que preside la conseyera de Cultura y Turismu, Mercedes Álvarez, constató que'l Muséu de Grandas, "vien incumpliendo sistemáticamente los requerimeintos d'información efectuaos por dellos organismos públicos, ente ellos la Conseyería d'Economía y Facienda".
  
Ente otres cuestiones, el Gobiernu señala que "nun se facilitó información sobre los contratos efeutuaos". De la mesma manera, caltién que l'actual direición nun adautó les cuentes del centru a los modelos contables d'aplicación nel Principáu colo que "nun se pue considerar presentaes nin reflexen el valor del patrimoniu real con que cuenta".
  
Mercedes Álvarez señala amás que se constataron problemes n'otros ámbitos de la xestión del Muséu, como l'ausencia d'una organización y xestión del sistema documental del centru, "lo que determina que nun s'ellaborare un rexistru y inventariu de los bienes culturales existentes nel centru".
  
Pal Executivu esti incumplimientu en cuestiones rellacionaes cola xestión de los fondos del Muséu "llegó al estremu de que nos últimos años nun se tán rellenando los cuestionarios estadísticos del Ministeriu de Cultura, colo que s'incumple ún de los requisitos fundamentales pa que'l centru pue algamar la cagetoría llegal de Muséu".
  
De la mesma manera, a pesar de los requerimientos del Consorciu, la Direición del Muséu "nun promovió les midíes necesaries pa que'l centru garantice la correcta conservación y custodia de los bienes depositaos nel mesmu, nin pa que se cumpla la prevención de riesgos llaborales".  
  
Poro, el Consorciu aprobó güei un cambiu na direición del Muséu Etnográficu de Grandas, col envís de "promover la so actividá, regularizar el so funcionamientu y poner en valor la so coleición", de manera tala que puea consolidase como "la cabecera de los museos existentes nel occidente asturianu y nel centru de coordinación de les actuciones etno-arqueolóxiques que se faen nesta zona".
 
Nuevu direutor
 
El Consorciu nomó al historiador Francisco Cuesta Toribio, de 48 años, nuevu direutor del muséu. Toribio dirixó delles escavaciones arqueolóxiques y ye autor de publicaciones científiques y estudios patrimoniales y de museos. Ye llicenciáu en Filosofía y Lletres pola Universidá Autónoma de Barcelona y según la Conseyería, “tuvo un papel destacáu na definición y puesta en marcha de los parques arqueolóxicos como ámbitu de proteición y puesta en valir patrimonial”.
 
Cuesta Toribio foi direutor de la Campa Torres y tien esperiencia nel ámbitu de les escueles taller, siendo direutor de la rellacionada col Archivu Históricu Industrial d’Ensidesa n’Avilés.