300 trabayadores de la concertada piden la dimisión del Conseyeru d'Educación

Los sindicatos axuntaron énte Presidencia n'Uviéu a más de 300 trabayadores pa pidir la dimisión de Riopedre y reclamar que "acabe cola discriminación de la enseñanza concertada". Según el Principáu, la fuelga tuvo un siguimientu del 30%.

Los sindicatos representativos de los trabayadores de los centros educativos concertaos d'Asturies, Otecas, USO, FSIE, CC.OO y FETE-UXT, foron los convocantes de la movilización .
  
El secretariu d'Aición Sindical d'Otecas, Juan Luis Barrera esplicó que "la situación de la enseñanza concertada n'Asturies, en rellación a la del restu d'España, ye la peor en tolos niveles". Tamién señaló que la "discriminación" que vive'l sector con respeuto a la enseñanza pública "ye mui notable en cuanto a plantiyes, salarios y recursos".
 
En respuesta a les declaraciones per parte de la conseyería, qu'aseguró que l'actual nun yera un buen momentu presupuestariu, Barrera dixo que les reivindicaciones de los trabayadores de los centros concertaos llevaben diez años en vixencia, polo que "paez ser que nunca foi un bon momentu presupuestariu pal sector de la concertada".
 
"Entendemos qu'España y Asturies nun pasen una bona época pola actual crisis, pero tamos dispuestos a falar de calendarios na aplicación de los acuerdos. Lo único que queremos ye sentamos a negociar", añadió'l secretariu d'aición sindical d'Otecas.
 
Siguimientu según el Principáu
 
Según los datos ofrecíos güei pola Conseyería d'Educación y Ciencia d'Asturies, el siguimientu de la fuelga celebrada güei algamó un 30% del personal convocáu. El Serviciu d'Inspeición constató que la xornada de paru desarrollóse ensin incidentes nos centros normativos, que permanecieron abiertos pa presentar la necesaria atención al alumnáu.