El Museo Etnográfico de Grandas de Salime llevará’l nome del so fundador, Pepe ‘El Ferreiro’

El sábadu pasáu dexónos Pepe ‘El Ferreiro’, figura clave na conservación y proteición del patrimoniu cultural del occidente del país y fundador del Museo Etnográfico de Granda de Salime, del que foi destituyíu pol Gobiernu de Vicente Álvarez Areces nel 2010. La conseyera de Cultura, Política Llingüística y Turismu, Berta Piñán va proponer que la instalación lleve’l nome del so creador.

José María Naveiras, conocíu por toos como Pepe ‘El Ferreiro’, finó a los 78 años dexando una importante buelga. Llabrador, ganaderu y ferreru ilustráu, punxo en valir la cultura del pueblu, la rural, siendo clave na recuperación de los elementos etnográficos del Eo-Navia.

Asina, con oxetos que foi recoyendo per tola zona, creó nel 1984 el Museo Etnografíco de Grandas de Salime. Foi direutor del mesmu hasta l’añu 2010, cuando una decisión polémica del Gobiernu socialista de Vicente Álvarez Areces sacólu del cargu por cuestiones personales antroxaos d’incumplimientos na xestión de la instalación.

El mundu de la cultura asturiana movilizóse y foron numberoses les protestes que pidíen la restitución d’El Ferreiro na direición del muséu que fixo coles sos manes, pero la decisión del Consorciu pa la Xestión del Museo Etnográficu de Grandas de Salime, presidíu pola conseyera de Cultura, Mercedes Álvarez, nun se revocó magar que meses depués un xulgáu d’Avilés consideraría improcedente’l despidu. PP y IX-Bloque por Asturies-Verdes posicionárense nesi tiempu a favor de Naveiras na Xunta Xeneral, al igual qu’Unidá Nacionalista Asturiana (UNA) fuera del Parllamentu, quedando la FSA-PSOE sola na defensa de la so destitución.

Amás de crear un muséu etnográfiu referencia non sólo nel Estáu, sinón en toda Europa, El Ferreiro tamién va pasar a la historia por ser ún de los descubridores de castru de Chao Samartín. El so esmolecimientu tres los afayos fechos nel llugar nel 1977 permitió que, 13 años más tarde, comenzara la escavación d’ún de los xacimientos prerromanos más importantes del país.

Anuncia nel Plenu

El Conseyu de Gobiernu d’esti xueves va tratar la propuesta de la conseyera de Cultura, Política Llingüística y Turismu pa que’l Museo Etnográfico de Grandas de Salime lleve’l nome de so fundador. Piñán anunciólo nel Plenu tres una entruga de Foro sobre’l castru de Chao Samartín qu’aprovechó Adrián Pumares pa recordar al “descubridor de los primeros elementos que permitieron valorar l’interés científicu y animar la escavación” del xacimientu, “una perda irreparable pa la cultura asturiana”.

Pela so parte, la escritora refirióse a El Ferreiro, como “ún de los primeros impulsores de la investigación arqueolóxica d’esti importante testimoniu de l’Asturies prerromana”.

Semeya propiedá del Museo Etnografíco de Grandas de Salime.