Del Riego solicita a Facienda un plan d’aplazamientu de cuatro años p’absorber el déficit “heredáu”

Ramón del Riego aconceyó esti llunes en Madrid col secretariu d’Estáu de Facienda y Presupuestos. El conseyeru de Facienda y Sector Públicu pidió-y un plan d’aplazamientu de cuatro años “p’absorber el déficit escesivu heredáu del Gobiernu anterior”.
 
Según informó’l Gobiernu d’Asturies en nota de prensa, Del Riego propunxo tamién “que s’impongan sanciones, incluyíes inhabilitaciones, a los responsables del incumplimientu de les normes pa evitar la paradoxa de que sían premiaos políticamente los sos autores”. “El déficit esistente nun se pue enderezar de forma automática”, aseguró’l conseyeru a Juan Manuel López Carbajo, al que-y detalló’l déficit en qu’incurrió el Gobiernu d’Álvarez Areces que, a finales del 2010, “yera del 2,69 por cientu y, a 30 de xunu d’esti añu yera del 1,37 por cientu del PIB, cuando los techos marcaos pol ministeriu taben nel 2,4 por cientu y nel 0,75 por cientu del PIB, de manera respeutiva”.
 
El políticu de Foro Asturias Ciudadano (FAC) señaló que “resulta sorprendente que se pretenda la modificación de la Constitución, cola incorporación a ésta de topes sobre’l gastu públicu y, al mesmu tiempu, l’incumplimientu nun tenga sanción”. Na mesma llinia, De Riego criticó que “mentes que’l conseyeru de Facienda nuevu tien que comparecer en Madrid a rendir cuentes, el señor Areces, responsable máximu del escesu de déficit del Principáu d’Asturies nel primer semestre del 2011, o’l señor Barreda, paez que reciben del so partíu’l premiu de ser candidatos a les Cortes. Ye un contrasentíu”, finalizó.