La diplomacia internacional celebra reuniones d'urxencia pa impedir la reconocencia de Palestina como estáu

Nueva York ta siendo, nes hores últimes, sede de delles reuniones na que la diplomacia internacional quier frenar la reconocencia de Palestina como estáu. La intención ye impedir qu’esta selmana se vote esti tema na sede de la ONX.
 
L'alcuentru más significativu ye'l que caltuvieron el primer ministru de l'Autoridá Palestina (AP), Salam Fayyad, y el ministru de Defensa d'Israel, Ehud Barak, qu'intentaría convencer al palestín de resolver el conflictu nel ámbitu billateral, según informó'l diariu 'Jerusalem Post'. Tamién aconceyaron la secretaria d'Estáu estauxunidense, Hillary Clinton, y l'Alta Representante pa Política Esterior de la Xunión Europea (XE), Catherine Ashton. “Reunímonos pa falar sobre'l camín a siguir”, dixo Clinton, negando qu'esto puea considerase un progresu.
 
Esta selmana, el presidente palestín, Mahmud Abbas, va solicitar a l'Asamblea Xeneral que reconoza a l'Autoridá Palestina como Estáu miembru de la Organización de Naciones Xuníes (ONX), dalgo que va aprobase de manera previsible. Darréu, va plantegase esti pidimientu al Conseyu de Seguridá, onde ye probable qu'Estaos Xuníos exerza'l so derechu a vetu pa torgar la so aprobación en beneficiu d’Israel. El país hebreu opónse de forma firme a que la cuestión se trate na ONX. Les conversaciones entamaes va un añu ente israelinos y palestinos permanecen suspendíes precisamente pola negativa de Tel Aviv a prorrogar la moratoria sobre la construcción d'asentamientos en Cixordania.
 
Amás de los aconceyamientos enantes señalaos, diplomáticos del Cuartetu pa Oriente Próximu –integráu por Estaos Xuníos, Rusia, la XE y la ONX– reuniéronse nes últimes hores p'analizar la situación, según informó un diplomáticu européu. Pela so parte, l'enviáu especial del Cuartetu, l'ex primer ministru británicu Tony Blair, alvirtió de les consecuencies que podría tener dicha reconocencia. “¿Ye posible atopar un camín que dexe a los palestinos avanzar significativamente na cuestión de la estatalidá sin qu'ello suponga'l fin de les negociaciones?”, cuestionó.