La fuelga de pilotos d’Air Europa va afeutar a dos vuelos diarios ente Asturies y Madrid

El paru que van celebrar tolos xueves y llunes los pilotos d’Air Europa a partir del día 22 va afeutar a dos de los cuatro vuelos diarios que xunen Asturies y Madrid. Por contra, nun va perxudicar a les conexiones con Barcelona, París y Canarias.
 
Ello ye que los díes de füelga, llunes y xueves, van vese afectaos el 13 por cientu del total de les operaciones d’Air Europa, según informó l'aerollinia, propiedá del grupu Globalia. Mentes, de los vuelos ente ciudaes de la Península Ibérica y ente éstes y les capitales europees, van considerase como servicios esenciales el 50 por cientu de les frecuencies, arredondiaes por escesu. Esto ye, si ente dos ciudaes tán programaos cinco vuelos, van operase trés y, si foren trés, despegaríen dos aviones.
 
Nel casu de los vuelos ente l’Aeropuertu d’Asturies y París y Barcelona, al operar de manera conxunta con Air France y Spanair, de manera respeutiva, nun van vese afeutaos. Tampoco los vuelos a Canarias, yá que los que tiene orixe o destín nestes isles o nes Illes Balears, van considerase servicios esenciales, según la resolución de dictada pol Ministeriu de Fomentu pa les xornaes de fuelga convocaes pol sindicatu de pilotos Sepla pa protestar pola esternalización “progresiva” de la producción d’Air Europa hacia otres compañíes.
 
D’esta forma, el paru va afeutar a dos de les cuatro conexiones diaries de l’aerollinia de Globalia ente Asturies y Madrid. Air Europa yá procedió a retirar de los sistemes de venta los vuelos suspendíos pola fuelga y estableció un protocolu pa que los clientes que de primeres adquirieren dalgún d'ellos pudieran cambialu d'hora o de día ensin gastu nengún; o, si lo prefieren, optar pola devolución del importe abonáu.