El pasáu 29 d’ochobre’l Gobiernu español al traviés del Director Xeneral de Cooperación Autonómica, Fernando Gurrea, unvió a Consuelo Vega, daquella Directora Xeneral de Promoción Cultural y Política Llingüística, una carta na que s’amestaba l’informe sobre llingües minoritaries ellaboráu pol Conseyu d’Europa y pidía que “fixere llegar el parecer" del Gobiernu asturianu no que-y afectaba. Nun hubo respuesta según denuncia Xuristes pol Asturianu.

Asturies.com abrió esta selmana a los sos usuarios la posibilidá de rexistrase nel mediu. Los usuarios rexistraos van dir teniendo accesu a delles posibilidaes d'interaición y participación, ente elles la posibilidá de comentar les noticies y amestar comentarios en Conceyu Abiertu.
 

El Conceyu Abiertu pola Oficialidá (CAO) celebra güei n'Uviéu una asamblea na que se van dir perfilando les llinies d'actuación de la plataforma d'equí en delantre. Los sos miembros van decidir el futuru del Conceyu na coxuntura política d'anguaño, na que nun paez que vuelva abrise'l discutiniu de la reforma estatutaria nesta llexislatura.

El Conceyu de L.lena presenta (presentación anulada pol temporal) esti vienres a les 19:00 hores nel Teatru Vital Aza de La Pola’l dvd “Música Tradicional en conceyu L.lena”. Esti dvd ye’l resultáu de la grabación n’abril del 2007 del conciertu-presentación del discu del mesmu nome, del que formen parte temes recoyíos nel Archivu de Tradición Oral del músicu y etnógrafu Xosé “Ambás”.

Asturies.com inaugura la so sección d'entrevistes con esti diálogu ente'l pedagogu y profesor d’asturianu en secundaria Iván Huerga y David Guardado, nel que entrambos faen un análisis d’aspectos concretos del procesu de normalización de la llingua asturiana.
 

La Xunta d'Escuela de Maxisteriu refugó esta mañana la propuesta de planes d'estudiu de la Escuela de Maxisteriu que dexaba fuera la llingua asturiana. Ente les voces crítiques colos planes tuvieron delles propuestes que pidíen la incorporación del asturianu. El resultáu foi de 48 votos a la escontra del Plan y 23 a favor.
 

Acordies con informaciones de Xunta Moza, la Escuela de Maxisteriu va votar el xueves los sos nuevos planes d'estudiu que van adaptar la enseñanza al espaciu européu. La Xunta Moza convoca una concentración de protesta el día 29 a les 11.30 delantre de la Escuela Universitaria de Maxisteriu y anuncia que d'equí allá va facer toles xestiones posibles pa torgar esta nueva una agresión a la llingua asturiana. El motivu ye que magar les promeses y les bones pallabres de la dirección del centru y del rector Vicente Gotor confírmase que los planes van escluyir a la llingua asturiana.  

La militancia de la Xunta pola Defensa de la Llingua ta iguando estos díes l'actu que'l próximu sábadu nel Muséu de Belles Artes d'Uviéu va conmemorar la presentación oficial del movimientu ciudadanu en xineru de 1984. Según pudo saber Asturies.com l'actu va presentalu Xune Elipe y nel van intervenir 3 persones que van facer un repasu a la historia de la organización.
 

Un equipu formáu por científicos de tol mundu topa más pruebes qu'amuesen la esistencia d'océanos d'agua en pasaes dómines de Marte.