48-23: L'asturianu inda tien una oportunidá en Maxisteriu tres perder la votación la dirección del centru

La Xunta d'Escuela de Maxisteriu refugó esta mañana la propuesta de planes d'estudiu de la Escuela de Maxisteriu que dexaba fuera la llingua asturiana. Ente les voces crítiques colos planes tuvieron delles propuestes que pidíen la incorporación del asturianu. El resultáu foi de 48 votos a la escontra del Plan y 23 a favor.
 
Pela mañana una concentración convocada d'urxencia pola Xunta Moza y la Xunta pola Defensa de la Llingua Asturiana, col sofitu de partíos, sindicatos y otres organizaciones, axuntó nel hall y nes puertes de la escuela universitaria a más de 100 persones. Dos enmiendes presentaes piden la incorporación de la mención al asturianu. 
 
Los manifestantes taben convocaos pola Xunta col sofitu de partíos como IU, Bloque, UNA y organizaciones xuveniles y estudiantiles como CUPA o UNA-Mocedá , qu'amosaron en notes de prensa la so refuga a la pretensión d'escluyir la llingua asturiana nos estudios de maxisteriu. Tamién los sindicatos SUATEA, CCOO, UXT y ANPE criticaron la decisión. Ente los presentes na concentración taben dellos miembros d'estes organizaciones, ente ellos, el diputáu d'IU, García Valledor.