El Gobiernu asturianu desatendió la petición del Estáu d’información sobre l’asturianu pal informe européu

El pasáu 29 d’ochobre’l Gobiernu español al traviés del Director Xeneral de Cooperación Autonómica, Fernando Gurrea, unvió a Consuelo Vega, daquella Directora Xeneral de Promoción Cultural y Política Llingüística, una carta na que s’amestaba l’informe sobre llingües minoritaries ellaboráu pol Conseyu d’Europa y pidía que “fixere llegar el parecer" del Gobiernu asturianu no que-y afectaba. Nun hubo respuesta según denuncia Xuristes pol Asturianu.

La denuncia d’esti fechu parte de l'Aconceyamientu de Xuristes pol Asturianu. Nun comunicáu señalen que  “les autoridaes españoles mintieron énte’l Conseyu d’Europa pa xustificar lo qu’ésti califica de ‘resquiebra ente la gran demanda social y el fechu de que la llingua asturiana entá nun tenga la reconocencia de cooficialidá’. Ficiéronlo y la mentira rescampló nel mesmu informe que sobro’l cumplimientu de la Carta Europea de les Llingües Rexonales o Minoritaries iguó’l Comité d’Espertos del Conseyu d’Europa. La dulda que queda ye si na mentira salió direutamente del Gobiernu español o vieno-y inducida pel d’Areces”.

Énte esta situación Xuristes pol Asturianu elevó una petición al Ministeriu d’Administraciones Públiques pidiendo los documentos unviaos pol Estáu a l’administración asturiana sobre esti asuntu. La respuesta del Ministeriu foi la carta unviada a Consuelo Vega, anguaño Directora Xeneral de Poliítica Llingüística na que se pide testualmente lo siguiente:

“Sra. Dª Consuelo Vega. Directora General de Promoción Cultural y Política
Lingüística. Consejería de Cultura y Turismo. Principado de Asturias.
 
Estimada Directora:

Acompaño a la presente el documento elaborado por el Comité de Expertos sobre lenguas regionales y minoritarias del Consejo de Europa, que contiene sus conclusiones sobre el modo en que las autoridades españolas han seguido las recomendaciones del Comité de Ministros del Consejo de Europa, así como las propuestas que se elevarían para que fueran adoptadas, en su caso, como nuevas recomendaciones de dicho Comité de Ministros.

En relación con dicho documento provisional, si lo considera oportuno, le agradecería nos haga llegar el parecer de esa Comunidad Autónoma en lo que se refiere a aquellos aspectos que le afectan singularmente”

En declaraciones feches esti sábadu al diariu La Nueva España, Consuelo Vega señala que “esta carta, en concreto, nun la recuerdo; lo que sí tengo claro ye que nun aportamos información porque nun hubo nenguna petición. Revisaré de nuevo tola documentación y a partir d'agora seguiremos más activos”.

Finalmente dende Xuristes pol Asturianu afirmen que “la señora Vega y el cargu qu’ocupa nun se desacreíten al facer eses coses porque dende l’Aconceyamientu de Xuristes pol Asturianu enxamás-yos dimos creitu dalu, nin a la direutora nin a la Direición Xeneral qu’esfruta. Tampoco vamos pidir el so cese porque a la señora Conseyera de Cultura de la que depende y al señor Presidente del Gobiernu que la nomó dámos-yos el mesmu creitu, a saber, nengún. Sicasí sorrayen que “vamos siguir xurgando pa descubrir a tolos responsables d’esti impresentable asuntu porque los ciudadanos d’Asturies tenemos drechu a saber nes manes que tamos”.
 
Asturies.com amesta en formatu PDF la carta unviada pol Ministeriu d'Administraciones Públiques a la Dirección Xeneral de Política Llingüística.