La Xunta va pidir la collaboración de tola xente que pasó pela organización nos sos 25 años

La militancia de la Xunta pola Defensa de la Llingua ta iguando estos díes l'actu que'l próximu sábadu nel Muséu de Belles Artes d'Uviéu va conmemorar la presentación oficial del movimientu ciudadanu en xineru de 1984. Según pudo saber Asturies.com l'actu va presentalu Xune Elipe y nel van intervenir 3 persones que van facer un repasu a la historia de la organización.
 
Tamién se van presentar dellos materiales en formatu vídeo y va aprovechase l'acontecimientu facer un llamáu a que tola xente que pasare pela Xunta a lo llargo de los sos 25 años pa que anove'l so compromisu militante y pa que collabore de forma específica apurriendo materiales d'audio y vídeo rellacionaos cola organización de defensa del idioma.
 
L'oxetivu ye trabayar nos próximos meses nel proyectu de la edición d'una historia de la Xunta que, si ye posible, tenga un formatu audiovisual.
 
Al final del actu va haber una actuación del cantautor Alfredo González y depués un pinchéu nel chigre de la Xunta, La Casa Posafuelles.