El futuru presidente de la Xunta de Galicia diz que “acabáronse les ‘galescolas’”

|

El próximu presidente de Galicia, Alberto Núñez Feijoo, afitó que “nun quier nenguna imposición llingüística” polo que va derogar el decretu d’“uso e promoción da lingua no ensino”, aprobáu pol gobiernu del PSOE y BNG en 2007. Según’l Partido Popular “hai una perda del usu del idioma gallegu” por una “mala política llingüística y la imposición del idioma” del anterior gobiernu.

Tres les elecciones del 3 de marzu, col resultáu d’una mayoría absoluta del Partido Popular, paez que van producíse dellos cambios na política llingüística nel país vecín. Asina lo confirmen les palabres del futuru presidente de la Xunta de Galicia, Núñez Feijoo, al conseñar qu’“acabáronse les ‘galescolas’”, en referencia a les escueles infantiles dependientes del gobiernu gallegu nes que la llingua vehicular yera’l gallegu, un modelu que va finar por cuenta que ye intención del PP derogar el Decretu d’“uso e promoción da lingua no ensino”, qu’afitaba esti modelu.

Según Feijoo los cambios na política llingüística “emprincipiarán a producise cola derogación del decretu del gallegu qu’entamó un conflictu llingüísticu en Galicia nun conocíu y la ellaboración d’una nueva propuesta con tres premises básiques, los pas escoyerán l’idioma na educación infantil de 3 a 6 años; amás, los alumnos podrán dirixise en clase al profesor en cualesquier idioma, lo mesmo que facer l’examen en castellanu o gallegu o estudiar por llibros de testu en dambes llingües; y los pas van dicir el próximu cursu en qué idioma quieren qu’estudien los sos fíos les asignatures troncales”.

Finalmente’l futuru presidente de la Xunta dixo que “vamos intentar siguir promocionando l’usu del gallegu” pero “nun marcu de llibertá llingüística”, conseñó que nel Parlamentu utilizará “con carácter xeneralísimu’l gallegu” y añadió que lo mesmo les resoluciones de la Xunta como les notificaciones alministratives “van facese nes dos llingües”.

Contador Estadistiques