La Coordinadora Ecoloxista denuncia irregularidaes na planta cementera de Rozón

La Coordinadora Ecoloxista d'Asturies denuncia que la planta cementera de Rozón (conceyu L.lena) lleva furrulando 11 meses ensin llicencia y que los terrenos nos qu’asitia tan alquilaos por una Fundación que preside’l propiu alcalde. Por too ello desixen la so “inmediata paralización”.

La CEA “desixe al Conceyu de L.lena la paralización inmediata de la  planta cementera asitiada  ente Rozón y Vega’l Rei, que lleva funcionando 11 meses ensin llicencia nunos terrenos alquilaos a la Fundación Rozón”.

Según la Coordinadora Ecoloxista d’Asturies “dicha instalación púnxose  ensin la correspondiente llicencia municipal d’obres y ensin el trámite obligatoriu del Raminp que ye preceptivu acordies al marco llegal d’anguañu. Hai que recordar qu’anque’l Raminp ta derogáu  pola nueva Llei de calidá del aire y protección de l’atmósfera 34/2007, pero l’ epígrafe 1 de la Disposición derogatoria afita que’l citáu Reglamentu mantendrá la so vixencia naquelles comunidaes que nun tengan normativa aprobada na materia, como ye’l casu asturianu”.

Pa los ecoloxistes “resulta sorprendente que lleve casi una añu furrulando, ensin atender la denuncia que presentamos el pasáu 18 de febreru, ensin atender tampoco les denuncies de los vecinos arreyaos, a los cuales nun se-yos preguntó  l’aceptación de la instalación pola proximidá d’esta a les sos cases”.

Finalmente la CEA “sorpréndese que los terrenos ú ta asitiada la planta tean alquilaos a una Fundación que preside’l propiu alcalde y qu’esta planta tea funcionando con total impunidá, lo que denota una complicidá inaceptable pa una instalación illegal con un fuerte impacto pa los vecinos”.