La Coordinadora Ecoloxista presenta alegaciones contra l’ampliación de la cantera de Peñamiel

La Coordinadora Ecoloxista d’Asturies ta acabante de presentar alegaciones na Dirección Xeneral de Minería y Enerxía contra l’ampliación de la cantera de Peñamiel, nel conceyu de Morcin.

Pa la Coordinadora Ecoloxista d’Asturies “esta nueva ampliación de la cantera ye un despropósitu cuando resulta evidente l’impactu que supón pa la zona l’actual esplotación y les numberoses irregularidaes que se cometen y que cualesquiera puede comprobar con solo pasar pela zona”.

Les alegaciones ecoloxistes céntrense nel impactu nel paisaxe y na fauna por cuenta que “l’informe d’impactu ambiental de dicho proyectu tien errores y omisiones a esgaya, al nun existir censu algún de la realidá ambiental de la zona anguaño”. Tamién señalen l’impactu nel cauce del riu Riosa y nel aire yá que la cantera “nu cumple cola obligación que tienen de disponer de los correspondientes sistemes de protección, captación y depuración, que garanticen el cumplimientu de los niveles d’emisión previstos na Llei 34/2007, de 15 de payares, de calidá del aire y protección de l’atmósfera”.

L’impactu sobre’l Patrimoniu Arqueolóxicu y Cultural y un “inadecuáu plan de restauración”, améstense a les crítiques a esta ampliación, a lo que s’añade la “falta d’aceptación social” por mor qu’en “nenguna parte del espediente detállase que los vecinos que viven na zona conozan con detalle’l proyectu, o dieren el preste a esta ampliación”.

Finalmente dende la CEA conseñen que “esta nueva ampliación torga’l desarrollu de la comercialización de los materiales recuperaos d’estériles de la construcción de los qu’Asturies produz tolos años más de 800.000 tonelaes. Por ello creemos que se debe favorecer l’usu de materiales reciclaos de la construcción enantes d’ampliar más canteres”.