Bloque y UNA refuguen les declaraciones de Consuelo Vega sobre la oficialidá

Bloque por Asturies y Unidá Nacionalista Asturiana refugaron la comparanza de la llingua asturiana col vascu y col inglés d'EE.UU que fixo Consuelo Vega, cuando afirmó que la oficialidá de la llingua nun tien que ver col so peligru de desapaición. A les crítiques axuntóse tamién l'Asociación de Trabayadores de Normalización Llingüística.

Dambes formaciones polítiquues recordaron que'l vascu, amás de ser oficial, cuenta con planes de normalización, y que l'inglés nun ye oficial n'Estaos Uníos, porque nes principales comunidaes de fala anglosaxona nun hai llingües oficiales.
UNA y Bloque refugaron les afirmaciones de Consuelo Vega, tres conocese el peligru de desapaición que cuerre l'asturianu, según la última versión del 'Atles de les llingües en peligru del mundu', acabante de publicase. Vega recordare que la llingua vasca tamién ya incluyida nel 'Atles' y sin embargu sí ye oficial, y que l'inglés nun nel 'Atles' y nun lo ye.
   Según el Bloque, comparar al asturianu col inglés "ye mentir o nun saber de lo que se fala porque onde l'inglés ye la llingua propia nun hai idomes oficiales y non oficiales, y equí la Constitución Española diz que les llingues tienen que ser oficiales, por eso tamién tien que saber que nun se ta respetando la Constitución y xustifica que n'Asturies haya persones de primera o de segunda dependiendo l'idoma que falen". UNA añadió que nes comunidaes anglófiles "nun existe na llexislación la figura xurídica d'oficialidá d'una llingua".
   Sobre l'euskera, Bloque refugó igualmente la comparanza, porque facela ye "tar fuera bolos". Según UNA, amás d'oficialidá, el 'euskera' "goza d'un ambiciosu programa de normalización".
   Dambes organizaciones almiten que la oficialidá por sí mesma nun garantiza la sobrevivencia de la llingua, pero, según el Bloque, "la non oficialidá condénalu a desapaecer, y viola los derechos de los falantes d'asturianu y eso tien que lo saber ella (Consuelo Vega)". Pa UNA, esta midida "ye imprescindible p'algamala, como tol mundu sabe, polo que considerando la situación dramática del asturianu, les declaraciones de consuelo Vega, propies d'un humorista que perdieron la gracia, sólo se puen considerar una broma macabra".
 
"NUN TA AL ALTOR"
   Pal Bloque, Consuelo Vega nun ta "al altor del cargu de desarrolla". "O miente descaradamente o nun s'entera de lo que tien ente les manes", afirmó la organización, que refugó tamién el conceutu de "economía práctica y tresmisión xeneracional", qu'argumentó Vega. "Lo que tien que facer esta señora ye trabayar con sen común y escuchar a los profesionales de la normalización llingüística, en cuenta zarrar les oficines de normalización llingüística y despreciar los sos informes", señaló.
   "Tamién tenía que trabayar porque l'asturianu seya normal na enseñanza, non dependiendo de ratios, y permitiendo que los maestros se puean presentar a unes oposiciones con normalidá", añadió.
   Pa la organización, "una dirección Xeneral de Política Llingüística nun ye garantía de nada si nun se trabaya en condiciones con polítiques series que permitan salvar l'asturianu, si piensa que la oficialidá nun salva la llingua menos lo va facer la inorancia y la incapacidá".
 
"FECHU GRAVÍSIMU"
   UNA, pela so parte, consideró un "fechu gravísimu", que "la responsable directa de la política llingüística diga que nun ye importante la oficialidá pa la sobrevivencia del asturianu". Acusó a Vega de "espardir dende'l so cargu una de les mentires que'l PSOE lleva tentando d'afincar na sociedá asturiana: que la oficialidá ye mala o nun ye necesaria pa promocionar de manera eficaz la llingua propia y asegurar el so futuru".
   A lo último UNA recuerda que'l "nomamientu de Consuelo Vega y l'actual política llingüística son les consecuencies d'un pautu de gobiernu firmáu ente PSOE y IU (acompañaos de la so mascota "asturianista" Bloque por Asturies), que dexó a la intemperie la nuesa llingua".
   Pela so parte, l'Asociación de Trabayadores de Normalización Llingüística tamién criticó la comparanza col inglés y el 'euskera', porque la considera "tendenciosa y d'una inorancia y una irresponsabilidá que nun se correspuende col cargu que tien".
   "Ye llamentable", afirmó la organización al traviés d'un comunicáu, "que Consuelo Vega dea lleciones sobre economía práutica y tresmisión xeneracional del asturianu cuando dende'l cargu qu'opcua nun se ta faciendo más nada que xestionar sovenciones y dar premios". "¿Cómo pretende da-y la vuelta a esta situación si tovía nun se diseñó un plan de normalización, si lo que se ta faciendo dende los Conceyos nun tien apoyu de la Conseyería, si la situación na enseñanza ye mentira que tea bien, si la presencia de la llingua na RTPA ye de chiste?, ¿a qué se dedica la Dirección Xeneral de Política Llingüística?", acabó.