Llangres presenta’l so discu en La Felguera

Llangres vuelve a casa pa presentar “Entá”, últimu cd de la banda que presentó la seronda pasada. El grupu va xubir al escenariu cola so formación nueva, qu’amiesta batería, teclaos y baxu a la base instrumental folk que ya tenía Llangres.
 
La cuenca’l Nalón vio nacer esti grupu alllá 2002 xuntando músicos del conservatoriu de la zona. Nel entamu, col primer discu “Stura”, Llangres tiró per una llínia de folk atlánticu, fiel a los cánones marcaos nesti estilu. Pero col tiempu esi folk foi enllenándose d’otros matices y sonoridaes, per un llau la llegada al grupu de la cantante Esther Fonseca fexo que los temes cantaos ganaran muncha importancia nel repertoriu del grupu, y per otru, la banda foi adulces chiscando esos temes cantaos de toques pop.
 
Esta tendencia vióse bien clara nel discu que presenten esti sábadu día 7 en La Felguera, qu’espublizaron na seronda de 2008, y que llevó’l pasáu  27 d’avientu’l premiu al meyor discu pop del añu nos premios de la crítica RTPA 2008. Pa llevar el soníu de “Entá” al directu, Llangres reforzó la so formación con nuevos instrumentos. Asina, siguen tando Viriu Fernández nel bodrhan y el bouzouky, Dolfu Fernández col vigulín, Borja Baragaño cola gaita y la xiblata, Yago Prado na guitarra y nel arpa y Esther Fonseca, reciente ganadora nel premiu al meyor cantar n’asturianu de la SGAE, na voz. A esta nómina de músicos folk súmase’l baxu de Pablo Álvarez, la batería de Javier González y el premiáu Alfredo González col teclúa.
 
El conciertu va ser a les 20:15 hores nel Nuevu Teatru de La Felguera, y va ser el primeru d’una riestra de presentaciones que quier el grupu per toa Asturies, Uviéu y l’occidente d’Asturies son los próximos destinos de la música Llangres.