El Parlamentu asturianu solicita que se regulen de manera esplícita les inxenieríes informátiques

El Plenu de la Xunta Xeneral del Principáu d'Asturies (XXPA) aprobó por unanimidá una proposición non de llei del PP na que pide al Gobiernu estatal la necesidá d'aprobar, nel marcu de la llexislación sobre atribuciones profesionales, la regulación esplícita de la Inxeniería y Inxeniería Técnica n'Informática n'España, asina como la so consideranza n'igualdá de condiciones que'l restu de les inxeneríes.

   El diputáu del PP, Emilio Pérez Cueva, encargáu de defender la proposición, dixo que los informáticos sufren un "agraviu" ante la "dexadez" del Gobiernu central. Asina, esplicó que güei, los inxenieros informáticos tán nun sector non reguláu, y asina, l'actividá na so profesión pue realizase por cualquiera, seya o non tituláu.

   Emilio Pérez consideró asina urxente que s'ellabore y apruebe una llei d'atribuciones pa dicha profesión. El PP tuvo qu'aceptar una enmienda de PSOE y IU-BA-Verdes que suprimía'l pidimientu de que la regulación fuere "darréu".

   Pela so parte, el diputáu del PSOE, Alfonso Rey, llamentó que la iniciativa nun llegare a la Cámara por consensu y reclamó al PP más modestia. Esplicó que'l colectivu d'informáticos nun ta indefensu, porque hai contactos dende'l Gobiernu d'España y dende'l Gobiernu d'Asturies. La diputada d'IU-BA-Verdes, Emilia Vázquez, caltuvo pela so parte, que ye necesaria la regularización del sector pa evitar l'intrusismu que se xenera na profesión.