Soxepsa diz "ser ayena dafechu al plan Cabueñes" y asegura qu'Ovidio Blanco nun forma parte de la so plantiya

La Sociedá Mista de Xestión de Suelu del Principáu (Soxepsa) diz ser "dafechu ayena al Plan Parcial de Cabueñes" y niega que l'ex arquitectu municipal de Xixón, Ovidio Blanco, forme parte de la so plantiya. Según la sociedá, el técnicu "tien soscritu con Soxepsa un contratu temporal de serviciu como profesional". Ovidio Blanco algamó un beneficiu de más de 600.000 euros al revender una finca afeutada pol Plan Parcial de Cabueñes. L'asuntu yá ta en manes de la Fiscalía.

   Nel comunicáu, Soxepsa informa de que "nun tien nenguna rellación, nin realizó trabayu dalgún, col Plan Parcial de Cabueñes y ye, poro, ayena dafechu a dicha actuación urbanística".

   Encuanto a la rellación contractual con Ovidio Blanco, la sociedá esplicó que "consiste nuna prestación temporal de servicios profesionales y asistencia técnica, un tipu de contratu que Soxepsa caltién con otros profesionales llibres --abogaos, inxenieros, arquitectos-- sin que por ello formen parte de la plantiya d'emplegaos".

   Según el contratu, "la so presencia física na empresa lléndase sólo al tiempu requeríu pa realizar dichos servicios". "Soxepsa ye un cliente más d'Ovidio Blanco Suárez", espón el comunicáu onde s'añade que'l contratu con Blanco incorpora "una cláususa d'incompatibilidaes pola que'l contratáu nun va poder desarrollar actuaciones profesionales o llaborales, pagaes o de baldre, pa persones o entidaes distintes a la sociedá contratante en rellación colos asuntos o actuaciones nos qu'intervenga en virtú del presente contratu".