El paru aumentó n'Asturies un 1,2 por cientu en marzu

El paru aumentó n'Asturies un 1,2 por cientu'l mes de marzu pasáu hasta asitiase en 74.381 desempleaos, según datos del Ministeriu de Trabayu y Inmigración. Asturies foi xunto con Baleares (+1,06) les comunidaes onde menos subió'l desempléu. A nivel estatal el desempléu superó los 3,6 millones de paraos, un 3,5 % más.

Por xéneru, el colectivu femeninu ye'l que presenta un mayor índiz de paru con 39.527 desempleaes frente a los 34.854 homes. Por edá, hai inscritos 9.069 mozos menores de 25 años. El mayor aumentu de paraos rexistróse, sicasí, ente mayores de 44 años al pasar a les llistes del INEM un total de 1.699 y el d'ente 30 y 44 años qu'esperimentó un aumentu de 1.441 paraos.

En cuanto a sectores, el colectivu de servicios ye'l que concentra el mayor volume de desempleaos con 249 paraos más que sumen yá 47.476; darréu asitia la industria con 204 paraos más que yá son 9.123 en total. Nel sector primariu tan inscritos 736 paraos, 22 más que nel mes anterior, y el colectivu de demandantes ensin empléu anterior creció en 373. Sicasí, nel sector de la construcción n'Asturies el númberu de paraos descendió en 125 y situóse en 11.666.