El BNG súmase a la coalición d'ERC y Aralar pa les elecciones europees

La Executiva del Bloque Nacionalista Galego dio anuncia de la intención de la formación gallega de sumase a la coalición encabezada por Esquerra Republicana de Catalunya y Aralar. Pela so parte, estes dos últimes formaciones conseñaron ayer en Bilbao el pactu que pon en marcha la candidatura conxunta a les elecciones europees de xunu, a la qu'esperen que se sumen más fuerces de la izquierda nacionalista del estáu.

Ayer la Executiva del BNG dio'l preste a sumase a la coalicion d'ERC y Aralar. Esta decisión tien de ratificala'l próximu sábadu'l "Consello Nacional do BNG". D'aprobase la propuesta, supón l'abandonu de la candidatura de Galeuscat per parte de los nacionalistes gallegos de cara a les elecciones, candidatura na que se presentaron nes pasaes elecciones al parlamentu européu xunto al PNV y CiU. Según señalen dende'l BNG lo que se propón "nun ye menoscabo del so compromisu cola plataforma Galeuscat, que tien nel rediseñu del Estáu español, y non tanto nel escenariu electoral, la so verdadera razón de ser".

Pela so parte l'alcuerdu de collaboración firmáu ayer en Bilbao ente la formación vasca Aralar y ERC, que tien como consecuencia inmediata la candidatura conxunta, representa'l lo mesmo pal presidente de los catalanistes, Joan Puigcercós, como pal coordinador xeneral d'Aralar, Patxi Zabaleta, una "apuesta pol independentismu d'izquierdes", añadiendo que "la so intención ye axuntar mas fuerces afines del restu de l'Estáu a la coalición", ente les que s'alcuentra la tamién vasca Eusko Alkartasuna.
 
Sicasí, el vicepresidente d'EA, Koldo Amezketa, declaró que si bien el so partíu "sigue contemplando" concurrir con ERC a les elecciones, "esta nun ye la única opción y too ta abierto dafechu". Asimesmo criticó a la formación catalana pol so "conceptu de llealtá".