La Coordinadora Ecoloxista alega contra’l proyectu d’un parque eólicu en Les Regueres

La Coordinadora Ecoloxista d’Asturies presentó alegaciones énte’l Conceyu de Les Regueres nel trámite de la llicencia municipal pal parque eólicu na Peña’l Cuervu, na llende de los conceyos Les Regueres, Candamu y Illas, por supuestes “irregularidaes”.

Dende la Coordinadora señalen que “anque de momentu entama la tramitación pa la instalación de 8 molinos de 2 Mw caún, el proyectu orixinal que presentare Ibereólica SL contemplaba la instalación de 24 molinos asitiaos en Les Regueres y Candamu, de momento solo van poner nel primer de los conceyos”. Esti va ser “l’únicu parque na zona central”, el restu tan nel occidente del país.

Según los ecoloxistes “hubo numberoses irregularidaes na tramitación qu’obliguen a que se vuelva a tramitar l’espediente”. Dende la CEA destquen que’l “llugar ú van asitiar el parque eólicu denominábase Suelu Non Urbanizable d’Interés Forestal nel momentu de solicitar l’autorización alministrativa de la instalación concedida pente resolución de 11 d’ochobre de 2005”.

Asimesmo “pretenden seguir alantre col proyectu  ensin tener en cuenta que la Declaración d’Impactu Ambiental (DIA) del parque caducó”. Según afiten “nel capítulu 1 punto 6 de la DIA diz ‘que’l retrasu nel iniciu de les obres d’execución del parque, a partir de la data de publicación de la presente declaración, por un plazu superior a tres años determinará la so caducidá. Baxo esti supuestu, el proyectu deberá sometese de nuevu a procedimientu d’evaluación d’impactu ambiental’”, polo que según esti puntu “la DIA caducó’l 29 de xunetu de 2007”.

Finalmente dende la CEA recordaron qu’Asturies “ye escedentaria na producción d’enerxía eléctrica qu’esportamos a les comunidaes riques del centru y mediterráneu español”.