La Bandina toca na Korrika

|

El grupu de folk asturianu La Bandina va hermanar l'asturianu col euskera tocando nuna fiesta de La Korrika, iniciativa que se celebra cada dos años y que percorre Euskadi, Iparralde y Navarra como medida de sensibilización y promoción del euskera. La Bandina va compartir cartel con otros grupos -y otres llingües- del Estáu español.
 
La Korrika ye un actu revindicativu que consiste en que miles de persones cuerren día y nueche per tol dominiu llingüísiticu euskaldún. Los participantes de la carrera van pasándose un testigu que simboliza la tresmisión del euskera, representando la carrera d'esta manera un manifiestu pola supervivivencia y vitalidá de la llingua vasca. Amás, la carrera tamién sirve pa recaudar fondos pa los entamadores de la Korrika, AEK, que ye la Coordinadora d'Alfabetización y Euskaldunización p'adultos. Les perres entren gracies a que la xente o asociaciones compren kilómetros pa llevar el testigu, sofitando d'esta manera esta iniciativa a favor del euskera.
 
La Korrika pasa per bien pueblos de tola xeografía d'Euskal Herría, colo que munches vegaes esos llugares aprovechen pa entamar actividaes pa recibir, en clave de fiesta, la llegada de la Korrika. Con motivu d'una d'estes fiestes ye polo que La Bandina va tocar en Santurtzi, nuna nueche na que va compartir escenariu con otros trés grupos que viene  representando a otres realidaes llingüístiques del Estáu español. Ello ye qu'amás de los asturianos van tar  Gatu Malu (folk) dende Cantabria, Maitips (reggae-ska) de Cataluña y Esne Beltza dende Euskal Herria. La cita ye esti mesmu vienres día 3, pela nueche, ya que la intención de la organización ye que la fiesta musical llegue hasta les 5:15 de la madrugada que ye cuando s'espera que llegue'l testigu de La Korrika a Santurtzi.

Contador Estadistiques