Iglesias diz sobre Valledor que "ye preferible equivocase dientro de la organización qu'acertar fuera"

El coordinador xeneral d'IU n'Asturies, Jesús Iglesias, señaló que "siempre ye preferible equivocase dientro de la organización qu'acertar fuera". Iglesias refirióse asina a la postura qu'adoptó'l diputáu García Valledor, al frayar la disciplina de votu del so grupu parlamentariu tres apoyar la selmana pasada la moción presentada pol PP na que se pidía la retirada del plan d'evaluación del profesoráu y la convocatoria de la mesa sectorial d'educación.

   Iglesias realizó estes manifestaciones demientres la rueda prensa qu'ofreció güei na sede d'IU d'Asturies, xunto al diputáu nel Congresu de los Diputaos, Gaspar Llamazares. L'alcuentru valió pa qu'Iglesias presentare delles midíes contra la crisis económica.

   El coordinador d'IU n'Asturies aseguró que la próxima selmana va aconceyase la comisón executiva p'analizar el comportamientu de Valledor na Xunta Xeneral y adoptar una decisión. "Existen normes de funcionamientu dientro del partíu qu'establezan el respetu a la decisión de la mayoría", señaló Iglesias y añadió que "los problemes vienen cuando eses normes nun s'acaten".

   El cabezaleru d'IU n'Asturies destacó que na vida política "ye importante que les organizaciones actúen hacia afuera con un solu discursu".